Зьняволены экс-прэзыдэнт Грузіі Міхэіл Саакашвілі 1 лютага дыстанцыйна падключыўся да пасяджэньня Тбіліскага гарадзкога суду, які разглядае хадайніцтва адвакатаў аб адтэрміноўцы прысуду і вызваленьні Саакашвілі па стане здароўя, паведамляе сайт «Эхо Кавказа».
На ўкраінскай мове ён зачытаў свой зварот да Ўкраіны, у якім заявіў, што ўпэўнены ў яе перамозе:
«Але калі я ня выжыву, маё сэрца павінна быць пахаванае ў Кіеве», — сказаў Саакашвілі.
Ён таксама заявіў, што ў турме яго катавалі і атручвалі, піша сайт Newsgeorgia.ge. Затым экс-прэзыдэнт падняў майку і прадэманстраваў суду свой фізычны стан:
«Адзінае, пра што я прашу, — даць мне магчымасьць адэкватнага лячэньня», — сказаў Саакашвілі, зьвяртаючыся да суду.
На пачатку сёлетняга студзеня ў Грузіі і яшчэ больш як у 20 краінах прайшлі пікеты ў падтрымку Саакашвілі. Удзельнікі заклікалі вызваліць палітыка і даць яму магчымасьць прайсьці лячэньне ў ЭЗ. Некаторыя актывісты абвінавачвалі цяперашнія ўлады Грузіі ў тым, што яны дамагаюцца сьмерці Саакашвілі.
- Экс-прэзыдэнт Грузіі, які мае ўкраінскае грамадзянства, быў арыштаваны ў Тбілісі ўвосень 2021 году пасьля патаемнага вяртаньня ў краіну. Да таго часу ў дачыненьні да яго быў вынесены завочны прысуд — 6 гадоў пазбаўленьня волі па справе аб перавышэньні паўнамоцтваў.
- У сувязі з аслабленьнем здароўя Саакашвілі перавялі ў цывільную клініку ў Тбілісі. Сам палітык і ягоныя прыхільнікі настойваюць на тым, што пагаршэньне стану магло быць выклікана атручэньнем. Улады Грузіі сьцьвярджаюць, што для такіх высноў няма доказаў.
- Крымінальны перасьлед Міхэіл Сакашвілі называе палітычна матываваным.
