16 студзеня пачаўся разгляд справы журналіста і актывіста незалежнага Саюзу палякаў Беларусі Анджэя Пачобута.
Палітвязьня абвінавачваюць у закліках да дзеяньняў абмежавальнага характару, якія скіраваныя на прычыненьне шкоды нацыянальнай бясьпецы Рэспублікі Беларусь (ч. 3 арт. 361 КК), а таксама ў распальваньні іншай сацыяльнай варожасьці (ч. 3 арт. 130 КК).
Дэмакратычная лідэрка Беларусі Сьвятлана Ціханоўская ў буйным польскім выданьні Gazeta Wyborcza, карэспандэнтам якога зьяўляецца Анджэй Пачобут, выказала сваю думку аб працэсе над журналістам.
«Усе ведаюць, што гэта [абвінавачаньні, выстаўленыя Пачобуту] хлусьня, але маскі рэжыму Лукашэнкі даўно скінутыя і ён не клапоціцца аб захаваньні нават падабенства даверу. Вось і абвінавачвае людзей у абсурдных рэчах», — адзначыла палітык.
Сьвятлана Ціханоўская падкрэсьліла, асноўная мэта рэжыму — зламаць людзей, пазбавіць іх добрых якасьцяў, прымусіць пакаяцца ў злачынствах, якіх яны не зьдзяйсьнялі, прычыняючы ім фізычны і псыхалягічны боль.
«Мы бачым, што намаганьні рэжыму на Анджэя ня дзейнічаюць. Калі восеньню 2021 года яго папрасілі прасіць аб памілаваньні ў абмен на абяцаньне вызваленьня, ён адмовіўся. У выніку беларускі КДБ унёс Анджэя ў сьпіс асоб, „датычных да тэрарыстычнай дзейнасьці“. У гэтым рэестры, акрамя яго, 247 беларусаў, якія змагаюцца за свабоду Беларусі. Такім чынам турэмныя ўлады вядуць улік, каму трэба зьмяніць з жахлівых на невыносныя ўмовы ўтрыманьня. Цяпер у Анджэя яшчэ менш кантактаў з навакольным сьветам, і яму не дазваляецца дасылаць яму пасылкі або грошы на дробныя пакупкі ў турэмнай краме. Але самае балючае, што „тэрарысты“ пазбаўленыя спатканьняў зь сям’ёй, правоў на тэлефонныя размовы, а часта і на лісты. Тым ня менш мы ведаем, што Анджэй трымаецца. Такія моцныя людзі, як Анджэй, зводзяць беларускі рэжым з розуму».
«Для Лукашэнкі Польшча ня толькі суседняя краіна, але і ўвасабленьне ненавіснага Захаду»
Ціханоўская нагадала, што улады не ўпершыню спрабуюць зламаць Анджэя.
«За публікацыі, у т. л. у „Gazetа Wyborcza“ яго ўжо каралі штрафамі і адміністрацыйнымі арыштамі. Яго двойчы судзілі за „абразу прэзыдэнта“. Тым ня менш Анджэй працягваў сваю журналісцкую дзейнасьць, усё для таго, каб беларусы і грамадзяне іншых краін ведалі праўду аб тым, што адбываецца ў нашай краіне.
Анджэй таксама вядомы як чалавек, які змагаецца за правы польскай меншасьці. А для Лукашэнкі Польшча ня толькі суседняя краіна, але і ўвасабленьне ненавіснага Захаду і эўрапейскіх каштоўнасьцяў. Менавіта ў дачыненьні да Польшчы беларусы ацэньваюць свой узровень жыцьця, параўноўваюць цэны ў крамах, эканамічнае разьвіцьцё, рынак працы і магчымасьці для бізнэсу».
Ціханоўская лідэрка лічыць, што «час рэжыму скончыўся».
«У пачатку 1990-х Беларусь займала вельмі падобную стартавую пазыцыю [што і Польшча]. Але пры Лукашэнку яна пацярпела эканамічны, палітычны, сацыяльны і дэмаграфічны правал... Нядзіўна: бо мы ўвесь гэты час ішлі ў супрацьлеглых кірунках! Пакуль Польшча рухалася наперад да Эўропы і будучыні пад кіраўніцтвам Лукашэнкі, яна вярталася да мінулага, да „пяцігодак“ і „бітваў за ўраджай“.
Калі на пачатку свайго кіраваньня Лукашэнка сказаў: „Я не павяду Беларусь за цывілізаваным сьветам!“, шмат хто тады падумаў, што ён абмовіўся. На жаль, гэта аказалася праўдай. Беларусь зараз у глыбокім крызісе, на мяжы страты рэштак свайго сувэрэнітэту... Параўноўваючы Беларусь з Польшчай, беларусы ясна бачаць, у што ператварыў нашу краіну рэжым Лукашэнкі».
«Мільёны грамадзян Беларусі выбралі шлях свабоды ў 2020 годзе. Гэта немагчыма спыніць».
Паводле Ціханоўскай, менавіта за гэта Лукашэнка помсьціць Польшчы.
«Ён закрывае польскія школы, разбурае магілы салдат Арміі Краёвай, саджае ў турмы і катуе лідэраў Саюза палякаў Беларусі Анжаліку Борыс і Анджэя Пачобута.
Рэжым выстаўляе абсурдныя абвінавачваньні супраць Анджэя. І, вядома ж, тое, што чакае Анджэя, нельга назваць судом. Гэта фарс. Гэта спроба зьнішчыць моцных і сьмелых людзей. Спроба зламаць Анджэя, а таксама майго мужа Сяргея, пакранага 18 гадамі зьняволеньня, а таксама тысячы іншых людзей, пасаджаных рэжымам у турму. Але гэта таксама помста рэжыму за ўласны страх, помста за страчаны час. І ён, відавочна, гэта адчувае, таму ён так злы. Мільёны грамадзян Беларусі выбралі шлях свабоды ў 2020 годзе. Гэта немагчыма спыніць».
