Аналітыкі амэрыканскага Інстытуту вывучэньня вайны (ISW) перакананыя, што заява расейскага прэзыдэнта Ўладзіміра Пуціна аб аднабаковым прыпыненьні агню ва Ўкраіне на 36 гадзін зьяўляецца інфармацыйнай апэрацыяй, накіраванай на падрыў рэпутацыі Ўкраіны і яе войска.
«Такая паўза непрапарцыйна выгадная расейскім войскам і можа пазбавіць Украіну ініцыятывы. Пуцін ня можа чакаць, што Ўкраіна выканае ўмовы гэтага раптоўна абвешчанага прыпыненьня агню, і, магчыма, заклікаў да гэтага, каб назваць Украіну няўступчывай і неахвочай рабіць неабходныя крокі для перамоваў», — адзначаюць экспэрты.
Паводле іх, Расеі патрэбен перапынак, каб даць сваім войскам магчымасьць адпачыць, аднавіцца, пераарыентавацца і аднавіць наступальныя апэрацыі на крытычных участках фронту.
Апроч таго, гэтая ініцыятыва Крамля накіраваная на тое, каб прадэманстраваць, што Ўкраіна нібыта прыдушвае рэлігійныя свабоды, а Пуцін зьяўляецца «сапраўдным абаронцам хрысьціянскай веры».
Як адрэагавалі на ініцыятыву Пуціна ў Кіеве
Прэзыдэнт Украіны Ўладзімір Зяленскі заявіў, што ініцыятыва Пуціна аб нібыта спыненьні агню сьведчыць аб тым, што Расея хоча спыніць наступ Узброеных сіл Украіны на ўсходзе.
«Цяпер яны хочуць выкарыстаць Раство як прыкрыцьцё, каб хоць ненадоўга спыніць прасоўваньне нашых хлопцаў на Данбасе і падагнаць бліжэй да нашых пазыцый тэхніку, боепрыпасы і мабілізаваных. Што гэта дасьць? Толькі чарговае павелічэньне ліку стратаў», — заявіў Уладзімір Зяленскі.
Лідэры заходніх краін назвалі ініцыятыву Пуціна фальшывай і крывадушнай
Прэзыдэнт ЗША Джо Байдэн выказаў скептыцызм наконт каляднага замірэньня.
«Я неахвотна рэагую на ўсё, што гаворыць Пуцін. Цікава, што ён быў гатовы бамбіць лякарні, дзіцячыя садкі і цэрквы 25-га [сьнежня] і на Новы год. То бок, я думаю, ён спрабуе перавесьці дыханьне», — працытавала Байдэна тэлекампанія CNN.
Кіраўнік Эўрапейскай рады Шарль Мішэль перакананы, што адзіным сур’ёзным шляхам аднаўленьня міру зьяўляецца вывад расейскіх войскаў з Украіны, а не часовае замірэньне.
«Абвяшчэньне аб аднабаковым спыненьні агню ёсьць такім жа фальшывым і крывадушным, як і незаконныя і гратэскныя анэксіі і спадарожнікавыя рэфэрэндумы», — напісаў Шарль Мішэль на сваёй старонцы ў Twitter.
Міністар абароны Літвы Арвідас Анушаўскас мяркуе, што Расея хоча каляднага замірэньня, каб потым з новымі сіламі забіваць украінцаў.
«Пуцін загадвае Шайгу абвясьціць каляднае замірэньне, бо забойцы ж стаміліся і хочуць адпачыць адзін дзень. Яны хочуць каляднага замірэньня, каб з новымі сіламі прадоўжыць забіваць украінцаў у сваёй уласнай краіне», — напісаў літоўскі міністар на сваёй старонцы ў Twitter.
Міністар замежных спраў Вялікай Брытаніі Джэймс Клэвэрлі перакананы, што ініцыятыва Пуціна аб спыненьні агню не палепшыць пэрспэктывы міру.
«36-гадзінная паўза ў расейскіх атаках ніяк не палепшыць пэрспэктывы міру. Расея павінна назаўжды вывесьці свае войскі, адмовіцца ад незаконнага кантролю над украінскай тэрыторыяй і спыніць барбарскія напады на нявінных мірных жыхароў», — напісаў брытанскі міністар на сваёй старонцы ў Twitter.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
