Як інфармуе агенцтва DPA, Нямеччына таксама перадасьць Украіне зэнітную батарэю Patriot для супрацьпаветранай абароны. Рашэньне было прынята пасьля таго, як у сьнежні Вашынгтон паабяцаў Кіеву такую сыстэму. Таксама гаворка ідзе пра баявыя машыны пяхоты Marder, распрацаваныя для бундэсвэру больш за 50 гадоў таму. У Бэрліне не ўдакладняюць, колькі такіх машынаў будзе пастаўлена і калі.
Раней на гэтым тыдні ЗША заявілі аб магчымасьці адпраўкі ва Ўкраіну бронетранспартэраў Bradley — гэта будзе адна зь першых баявых машын заходняй вытворчасьці, якую атрымае Ўкраіна. Пакуль што краіны Ўсходняй Эўропы пастаўлялі толькі савецкія мадэлі.
«Абедзьве краіны плянуюць навучаць украінскія ўзброеныя сілы адпаведным сыстэмам», — гаворыцца ў заяве Белага дому, якую цытуе агенцтва AFP.
Украіна ўжо атрымала супрацьпаветраныя, транспартныя і браніраваныя эвакуацыйныя машыны заходніх вытворцаў.
Пра гэта стала вядома пасля рашэньня Францыі аб пастаўцы Кіеву баявых лёгкіх браніраваных машын AMX-10 RC.
Украіна неаднаразова запытвала пастаўкі нямецкіх асноўных баявых танкаў Leopard-2 і БМП Marder.
Раней Шольц зьвяртаў увагу на тое, што іншыя саюзьнікі па NATO таксама не прадастаўляюць цяжкага ўзбраеньня. 5 студзеня міністарка замежных спраў Анналена Бэрбак і віцэ-канцлер Робэрт Габэк заявілі пра пэрспэктыву новых ваенных паставак ва Ўкраіну.
У прыватнасьці, падчас візыту ў Нарвэгію Габэк паабяцаў хуткае рашэньне ўрада. Паводле яго слоў, пастаўкі зброі будуць «адаптаваныя да патрабаваньняў поля бою». Ён нагадаў, што ва ўраду Нямеччыны заўсёды было два крытэры прыняцьця рашэньняў у гэтым пытаньні: адзінства з партнэрамі і ваенная перавага на полі бою. «Здаецца, што і ў гэтай справе менавіта гэтак. І таму цяпер фэдэральны ўрад хутка абмяркуе гэтую сытуацыю і потым прыме адпаведныя рашэньні», — сказаў віцэ-канцлер.
Падчас прэс-канферэнцыі са сваім брытанскім калегам у Лёндане Бэрбак папярэдзіла, што Нямеччына і яе саюзьнікі не павінны пакідаць сумневаў у сваёй падтрымцы Кіева і павінны паглядзець, дзе магчымая дадатковая ваенная падтрымка.
Прэзыдэнт Украіны Ўладзімер Зяленскі назваў рашэньне Францыі паставіць машыны AMX-10 RC «ясным сыгналам» іншым краінам Захаду. «Няма рацыянальнай прычыны, па якой ва Ўкраіну да гэтага часу не пастаўляюцца танкі заходняй вытворчасьці», — падкрэсьліў ён.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
