З 6:00 11 сьнежня да 6:00 12 сьнежня адноўлена электразабесьпячэньне 410 населеных пунктаў па ўсёй Беларусі. На аднаўленчых работах было задзейнічаны 342 чалавекі пэрсаналу і 133 адзінкі тэхнікі, паведаміла «Белэнэрга».
У сувязі зь неспрыяльнымі ўмовамі надвор’я (моцны сьнег, дождж пры адмоўных тэмпэратурах, наліпаньне мокрага сьнегу на галінкі і правады) днём 11 сьнежня і ноччу 12 сьнежня пэрыядычна ўзьнікалі парушэньні электразабесьпячэньня ў разьмеркавальных электрасетках, пераважна ў Менскай вобласьці.
«Энэргетыкі працавалі і працягваюць працаваць ва ўзмоцненым рэжыме. Па стане на 6:00 12 сьнежня працягваюцца работы па аднаўленьні электразабесьпячэньня 113 населеных пунктаў», — гаворыцца ў паведамленьні.
Энэргетыкі робяць усе неабходныя дзеяньні для арганізацыі работ па аднаўленьні электразабесьпячэньня спажыўцоў у максымальна кароткія тэрміны.
