Касьцельны камітэт парафіі сьвятога Сымона і сьвятой Алены ў Менску ўхваліў просьбу пробашча Ўладзіслава Завальнюка на выкананьне абавязкаў дворніка пры закрытым Чырвоным касьцёле, паведамляе выданьне katolik.life з спасылкай на паведамленьня парафіі, якая апублікавала здымкі з подпісам: «Наш пробашч — ксёндз-канонік Уладзіслаў — перажывае зараз ня толькі „чорныя“ дні, але таксама і „белыя“...»
«Надалей просім вас, дарагія вернікі, аб малітве ў інтэнцыі нашай сьвятыні. Кожны чалавек і кожная сям’я маюць і свае ўласныя праблемы і цяжкасьці, таму, каб нашы малітвы былі мацнейшымі, заахвочваем далучаць да малітваў пост і ўстрыманьне. А таксама глыбей разважаем над Божым словам і зьдзяйсьняем добрыя ўчынкі», — адзначаецца ў аб’явах парафіі.
На мінулым тыдні стала вядома, што ксёндз-канонік Уладзіслаў Завальнюк напісаў заяву, у якой папрасіў дазволіць яму даглядаць тэрыторыю храма.
«Паколькі ў сувязі з тым, што з моманту інцыдэнту ўзгараньня ў закрыстыі касьцёла Сьвятога Сымона і Сьвятой Алены прайшло два месяцы, і касьцёл зачынены, а парафіяльная дзейнасьць прыпынена, то я як пробашч парафіі ня маю магчымасьці праводзіць богаслужэньні. Таму, каб я мог прыносіць карысьць парафіі, прашу дазволіць мне з 21 лістапада 2022 году выконваць абавязкі дворніка для прыборкі тэрыторыі вакол Чырвонага касьцёла, якая на гэты момант не прыбіраецца».
Мінула амаль два месяцы з моманту, як улады забралі ў вернікаў Чырвоны касьцёл. Забраную тэрыторыю не даглядаюць.
Касьцёльны камітэт разгледзеў заяву і схіляецца да таго, каб вынесьці станоўчае рашэньне, бо двор і сапраўды патрабуе прыборкі, пісаў сайт Чырвонага касьцёла.
- Чырвоны касьцёл быў закрыты ўладамі для вернікаў і сьвятароў пасьля інцыдэнту з узгараньнем 26 верасьня. Ужо неўзабаве ўлады пастанавілі адабраць будынак ад парафіі, матывуючы рашэньне неабходнасьцю рамонту.
- Ужо да 12 кастрычніка парафія мусіла забраць сваю маёмасьць з будынка. Але вернікаў і ксяндза не пускаюць у будынак касьцёла.
- Ксёндз-магістар Уладзіслаў Завальнюк 11 кастрычніка маліўся на ганку каля зачыненых дзьвярэй Чырвонага касьцёла, калі да яго падышлі міліцыянты ў форме і паспрабавалі гвалтам адцягнуць з патрабаваньнем: «Пройдёмте!». Сьвятар папрасіў іх не кранаць яго, і міліцыянты перасталі яго чапаць. Сілавікі перашкаджалі малітве і іншых людзей, якія зьбіраліся каля сьвятыні.
- 11 кастрычніка каталіцкая суполка накіравала Лукашэнку адкрыты ліст з просьбай дапусьціць упаўнаважаных прадстаўнікоў прыходу да агляду пашкоджаных пажарам збудаваньняў Чырвонага касьцёла ў Менску. Копія ліста разьмешчаная на сайце парафіі.
- Парафіяне таксама заявілі, што пажар у храме быў невыпадковы, і накіравалі ў Сьледчы камітэт запыт аб даваньні інфармацыі па выніках праведзеных сьледчых дзеяньняў.
- 13 кастрычніка споўнілася 175 гадоў фундатару касьцёла Эдварду Вайніловічу. Вайніловіч, гаспадарчы і палітычны дзяяч, мэмуарыст, нарадзіўся ў 1847 годзе. У 1905–1910 гадах на грошы Вайніловіча пабудавалі Чырвоны касьцёл у Менску ў памяць пра ягоных дзяцей, якія заўчасна памерлі, — Сымона і Алену Вайніловічаў.
- У пачатку лістапада Менгарвыканкам адмоўна адказаў на зварот парафіянаў, забараніўшы ім маліцца бліжэй чым за 200 мэтраў ад касьцёла.
