18–20 лістапада ў канадзкім Галіфаксе прайшоў штогадовы Міжнародны форум бясьпекі. Лідэр грамадзянскай кампаніі «Эўрапейская Беларусь» Андрэй Саньнікаў, які браў удзел у падзеі, апублікаваў фота з кіраўніком Пэнтагону Лойдам Остынам:
«Расказаў міністру абароны ЗША Лойду Джэймсу Остыну III пра полк Каліноўскага і падзякаваў за „Рамштайн“», — напісаў лідэр «Эўрапейскай Беларусі».
Міжнародная супольнасьць стварыла фармат «Рамштайн» для вайсковай дапамогі Ўкраіне — тэхнікай і ўзбраеньнем. Назву плян атрымаў ад месца правядзеньня першай сустрэчы міжнароднай кааліцыі — авіябазы «Рамштайн» у Нямеччыне.
Таксама Саньнікаў паведаміў, што сустрэўся на Міжнародным форуме бясьпекі з шэрагам іншых палітыкаў: віцэ-прэм’еркай Украіны ў пытаньнях эўрапейскай і эўраатлянтычнай інтэграцыі Вольгай Стэфанішынай, прэзыдэнтам форуму Пітэрам ван Прагам, экс-кіраўніком МЗС, Міністэрства абароны і былым генэральным пракурорам Канады Пітэрам Маккеем, іншымі дзеячамі.
