Як інфармуе DW, канцлер Нямеччыны Оляф Шольц і старшыня Эўракамісіі Урзуля фон дэр Ляен заявілі, што краіны ЭЗ і G7 павінны «ўжо сёньня» сумесна думаць пра ўдзел у аднаўленьні Ўкраіны пасьля вайны, разьвязанай Расеяй, і для гэтага неабходна распрацаваць праграму, якая сваім узьдзеяньнем на эканоміку павінна быць параўнальная з прынятым пасьля Другой сусьветнай вайны «плянам Маршала» (амэрыканскай праграмай дапамогі пасьляваеннай Эўропе).
Сумесны артыкул палітыкаў быў апублікавала ў нядзелю, 23 кастрычніка у газэце Frankfurter Allgemeine Zeitung.
Паводле Шольца і фон дэр Ляен, пасьля вайны Ўкраіне трэба будзе хутка «стаць на ногі» і аднавіць эканоміку, і ад праекту гэтай рэканструкцыі будзе залежаць тое, якой краінай Украіна стане ў будучыні. «Заўсёды варта быць асьцярожнымі ў параўнаньнях з гістарычнымі падзеямі, але гэта ня што іншае, як стварэньне новага „пляну Маршала“ XXI стагодзьдзі», — гаворыцца ў артыкуле.
Украіна не адновіцца без дапамогі
Палітыкі пералічылі сфэры і аб’екты інфраструктуры, разбураныя расейскімі войскамі і патрэбныя для аднаўленьня эканомікі Ўкраіны — жылыя дамы, школы, дарогі, масты і энэргазабесьпячэньне. Асобна канцлер Нямеччыны і старшыня Эўракамісіі згадалі інтэнсіўныя абстрэлы цывільных аб’ектаў ва Ўкраіне, якія вядуцца Расеяй з 10 кастрычніка, назваўшы іх тэрактамі.
На думку эўрапейскіх палітыкаў, ні Ўкраіна, ні асобныя яе партнэры ня змогуць даць рады з разбуральнымі наступствамі абстрэлаў з боку расейскіх войскаў, таму ўдзел у аднаўленьні Ўкраіны павінны сумесна прыняць «Эўразьвяз, G7 і партнэры далёка за іхнымі межамі», а таксама прыватныя інвэстары і кампаніі.
Пры гэтым мае быць створаны эфэктыўны наглядны орган для барацьбы з карупцыяй пры рэалізацыі праграмы. Як зазначаюць аўтары артыкулу, «шлях да аднаўленьня Ўкраіны — гэта таксама яе шлях у Эўрапейскі Зьвяз».
Ва Ўкраіне разбурана амаль 100 тысяч аб’ектаў інфраструктуры
Паводле стану на пачатак кастрычніка ва Ўкраіне было разбурана 94 596 аб’ектаў інфраструктуры, у тым ліку 74 тысячы жылых дамоў — такія дадзеныя прыводзіў намесьнік кіраўніка Офісу прэзыдэнта Ўкраіны Кірыл Цімашэнка. Больш за ўсё аб’ектаў разбурана ў Кіеўскай (звыш 25 тыс.), Данецкай (звыш 20 тыс.) і Харкаўскай абласьцях (звыш 9 тыс.).
Аб тым, што Ўкраіне для аднаўленьня патрэбная замежная дапамога, яшчэ ўвесну казаў сам Уладзімір Зяленскі. Ён таксама параўноўваў магчымую праграму дапамогі з «плянам Маршала» і прапаноўваў краінам-донарам узяць шэфства над асобнымі рэгіёнамі, гарадамі і галінамі эканомікі Ўкраіны, якія пацярпелі падчас расейскага ўварваньня.
На той момант Зяленскі ацэньваў кошт аднаўленьня ўкраінскай эканомікі і інфраструктуры пасьля расейскага ўварваньня ў 600 млрд даляраў. Аднак у выніку расейскіх абстрэлаў у кастрычніку гэтая сума можа вырасьці ў разы — паводле ўкраінскага боку, толькі з 10 кастрычніка ў краіне было разбурана больш за 30% электрастанцый.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
