Па справе праходзяць пяць чалавек — Дзьмітрый Сасноўскі, Аляксей Глотаў, Натальля Мацьвеева, Вадзім Гулевіч, Кірыл Ашурак.
Агулам іх судзяць па дзесяці артыкулах Крымінальнага кодэкса, у тым ліку, за тэрарызм.
Ім інкрымінуюцца тры эпізоды:
- спроба падрыва вузла сувязі Вайскова-марскога флёту Расеі ў Вілейцы,
- замах на прапагандыста Рыгора Азаронка
- і спроба зьнішчёньня лесанарыхтоўчай тэхнікі ў лясгасах.
Пра затрыманьне ўдзельнікаў «АГСБ» і гэтыя эпізоды стала вядома з выступу Лукашэнкі да Дня незалежнасьці ў 2021 года. Ва ўсіх эпізодах былі задзейнічаны «падстаўныя» саўдзельнікі-сілавікі.
Справу разглядае судзьдзя Сяргей Епіхаў, паведамляе «Вясна».
Згодна з вэрсіяй абвінавачваньня, якую агучылі на судзе, Гулевіч і Глотаў, «апрануўшыся ў камуфляжную форму і ўзяўшы агнястрэльную зброю, боепрыпасы для акту тэрарызму, праніклі на тэрыторыю ваеннага аб’екта. Глотаў зафіксаваў выбуховыя прылады, які валодалі паражаючым дзеяньнем у радыюсе ня менш за 11 мэтраў. Пасьля ўстаноўкі яны адышлі на бясьпечную адлегласьць».
Таксама ў судзе ўдакладнілі, што Вадзім Гулевіч, «плянаваў пасьля выехаць на тэрыторыю Ўкраіны, каб там праходзіць падрыхтоўку для ўдзелу ў баявых дзеяньнях». Аднак яго затрымалі ў Берасьці 28 чэрвеня 2021 года.
Гулевіч прызнаў віну часткова.
Спроба зьнішчыць лесанарыхтоўчую тэхніку ў лясгасах інкрымінуецца 39-гадовай Натальлі Мацьвеевай. Таксама пра гэты эпізод упершыню стала вядома ад Лукашэнкі 2 ліпеня 2021 года. Тады ён заявіў, што літаральна нядаўна спрабавалі зьнішчыць вялікую колькасьць лесанарыхтоўчай тэхнікі ў лясгасах.
Згодна з вэрсіяй абвінавачваньня, увечары 8 чэрвеня 2021 года разам зь нібыта саўдзельнікам, які на самай справе выконваў заданьне органаў дзяржаўнай бясьпекі, Мацьвеева прыбыла да лясгаса. Яна ўдзельнічала ў вырабе кактэйляў Молатава, пры дапамозе якіх павінны былі падпаліць тэхніку. Аднак была затрыманая да зьдзяйсьненьня, гэта значыць не давяла свае дзеяньні да канца.
Ёй інкрымінуюцца ч. 2 арт. 290-4 (удзел у дзейнасьці тэрарыстычнай арганізацыі), ч. 1 арт. 13 і ч. 2 арт. 289 (падрыхтоўка да акта тэрарызму), ч. 2 арт. 295-3 (незаконныя дзеяньні ў дачыненьні да прадметаў, дзеяньне якіх заснавана на выкарыстаньні гаручых рэчываў) Крымінальнага кодэкса Рэспублікі Беларусь.
Мацьвеева на судзе прызнала віну па ўсіх артыкулах.
32-гадовага жыхара Ліды Дзьмітрыя Сасноўскага затрымалі 1 чэрвеня 2021 года. Яго абвінавачваюць у замаху на прапагандыста Рыгора Азаронка. У фільме АНТ паказваюцца кадры нападу, праўда, на іх Сасноўскі бяззбройны. Нібыта Глотаў мусіў перадаць яму зброю. Сам напад на Азаронка зьдзяйсьняе чалавек, які, як мяркуецца, быў сілавіком.
Што адбывалася на судзе?
32-гадовы Дзьмітрый Сасноўскі зь Ліды падчас паседжаньня заявіў, што хоча адмовіцца ад грамадзянства Беларусі, таму што «не мае дачыненьня да тэрарызму». Ён падзякаваў сваякам, якія прыйшлі ў залю суда, каб падтрымаць яго, і заплакаў.
Пацярпелы Азаронак у залю суду не зьявіўся, суд пачаў судовае сьледзтва безь яго.
Як вынікае з абвешчанага абвінавачваньня Мацьвеевай, у арганізаваную групу тых, каго кіраўнік «АГСБ» Дзяніс Хромаваў-Хофман наймаў для зьдзяйсьненьня акту на тэрыторыі Беларусі, быў укаранёны апэратыўны супрацоўнік па прозьвішчы Гардзееў, пра што ня ведалі ні сама Мацьвеева, ні Хромаў-Хофман.
У матэрыялах справы 15 тамоў. За першы дзень усім абвінавачваньні зачытаць не пасьпелі.
