Міністар прамысловасьці Беларусі Аляксандар Рагожнік расказаў, як ідзе пераарыентацыя беларускага экспарту. Яго цытуе officelife са спасылкай на тэлеканал «Беларусь 1».
«Нягледзячы на ўсе цяжкасьці, нам удалося пераарыентаваць рынкі збыту: больш за 140% экспарту — у Расею, замясьцілі рынак Украіны і Эўразьвязу. Павялічылі значна пастаўкі на рынак Афрыкі — у Зымбабвэ, Эгіпет».
Рагожнік паведаміў, што па выніках дзевяці месяцаў году аб’ёмы павінны вырасьці прыкладна на 11% ад заплянаваных.
«Выйдзем па экспарце на 111%. У пачатку году попыт рэзка ўзрос, потым на рынку адбылася дэстабілізацыя — выпаў рынак Украіны, пад пытаньнем сталі пастаўкі ў ЭЗ».
Міністар сказаў, што ўсе цяжкасьці атрымалася пераадолець — рынкі збыту пераарыентавалі. Цяпер ёсьць «унікальны шанец для ўсіх прадпрыемстваў замясьціць тое, што выпала па імпарце».
Рагожнік расказаў, што перад Міністэрствам прамысловасьці стаяць «сур’ёзныя задачы» на наступны год:
«Па індэксе фізычнага аб’ёму — 105%, рост экспарту — на ўзроўні 100%, аб’ём інвэстыцый — больш за 120%».
