Кіраўніка горадзенскага «Цэнтру гарадзкога жыцьця» журналіста Паўла Мажэйку затрымалі 31 жніўня. Праз нейкі час яго перавялі ў СІЗА.
Перавод у СІЗА азначае, што яму прад’яўлена абвінавачаньне і выбрана мера стрыманьня — зьмяшчэньне ў сьледчы ізалятар.
20 верасьня праваабарончы цэнтар «Вясна» прызнаў Паўла Мажэйку палітзьняволеным. Адзначаецца, што яго ўзялі пад варту за рэалізацыю свабоды выказваньня мяркаваньняў. Цяпер у Беларусі 1334 палітвязьня.
У сакавіку 2021 году Паўла Мажэйку ўжо затрымлівалі разам з мастаком Алесем Пушкіным. Тады журналіста вызвалілі пасьля 72 гадзін.
Павал Мажэйка — вядомы горадзенскі журналіст, адзін зь лідэраў грамадзка-культурнага жыцьця гораду. У 2002 годзе яго асудзілі на два гады «хіміі» за «паклёп» на Лукашэнку ў артыкуле ў газэце «Пагоня» пра зьнікненьне Захаранкі, Ганчара ды іншых апанэнтаў уладаў. Мажэйка кіраваў «Цэнтрам гарадзкога жыцьця» Горадні, які ўлады зьліквідавалі летам 2021 году.
