На адкрыцьці выставы выступіў гурт «Літы талер». Імпрэза адбылася ў Музэі вольнай Беларусі ў Варшаве.
Графік Зьміцер Шапавалаў скончыў у 2010 годзе Беларускую акадэмію мастацтваў. На выставе ў Варшаве паказалі ягоныя графічныя творы розных гадоў.
«Сэнс праекту такі: гэта павінна быць выдадзеная кніга „Войска Вялікага Княства Літоўскага з ХІV па ХVІІ стагодзьдзе“. Асноўная мая мэта — менавіта ілюстрацыі, візуальная частка. Гістарычных дасьледаваньняў хапае — я кансультаваўся з гісторыкам, доктарам навук Юрыем Боханам.
А вось рэканструкцыі візуальнай ня так і шмат. І я падумаў, што ў некаторай ступені змагу гэтую незапоўненую нішу крышачку ўзбагаціць. Безумоўна, ніхто ўжо не падкажа, як гэта ўсё выглядала, могуць быць і некаторыя памылкі, але я стараўся максымальна зрабіць і прыгожа, і цікава, і гістарычна. Творы дзеляцца на падзеі з вайсковага жыцьця: бітвы, дуэлі; ёсьць і асобныя постаці, касьцюмы, зброя тагачасных ваяроў. Была спроба прыдумаць дызайн ордэну, які мог быць у Беларусі», — прызнаецца графік Зьміцер Шапавалаў.
На адкрыцьцё выставы прыйшло шмат вядомых асобаў: выдавец Андрэй Янушкевіч, лідэр гурту «Дай дарогу» Юры Стыльскі, сацыёляг Андрэй Вардамацкі і іншыя.
Гісторык Сяргей Кедышка, унук знакамітага беларускага падпольшчыка, Героя Савецкага Саюзу Мікалая Кедышкі, зрабіў відэапрэзэнтацыю асноўных падзей гісторыі Беларусі — ад Аршанскай бітвы 1514 году і бітвы пад Палонкай 1660 году да паўстаньня Кастуся Каліноўскага 1863 году і перазахаваньня парэшткаў Кастуся Каліноўскага і ягоных паплечнікаў у лістападзе 2019 году ў Вільні.
У канцы імпрэзы адбыўся выступ гурту «Літы талер».
Ля помніка Каперніку ў цэнтры Варшавы прайшоў мітынг да Дня беларускай вайсковай славы. Яго ўдзельнікі прынесьлі з сабою партрэты беларусаў, палеглых у вайне Расеі супраць Украіны і ўшанавалі іх памяць хвілінай маўчаньня.
Вячаслаў Сіўчык згадаў, як 30 гадоў таму ў Менску адбывалася публічная прысяга вайскоўцаў на вернасьць Беларусі, якую арганізаваў цяперашні палітвязень Мікола Статкевіч.
Пасьля мітынгу, у якім узялі ўдзел каля сотні чалавек, удзельнікі акцыі прайшлі шэсьцем па цэнтры Варшавы.
