У гарачую пару пратэстаў-2020 ГУБАЗіК узначальваў Мікалай Карпянкоў, які асабіста «граміў» вітрыны ў цывільным. Ён перайшоў на пасаду намесьніка міністра ўнутраных спраў. Пасьля Карпянкова ведамства ўзначаліў Андрэй Паршын. У чэрвені 2022 году Паршын стрэліў у падлетка, які «хуліганіў». Пазьней праўладныя тэлеграм-каналы распаўсюдзілі «пакаяльнае відэа» з бацькамі падлетка.
Дзе цяпер Андрэй Паршын — невядома.
Андрэй Ананенка працуе ў міліцыі з 1999 году. Пачынаў з аддзелу на транспарце камітэту па арганізаванай злачыннасьці і карупцыі. Быў старшым упаўнаважаным па асабліва важных справах ГУБАЗіК, намесьнікам начальнка аддзелу па прадухіленьні супрацьпраўнай дзейнасьці ў органах дзяржаўнай улады ўпраўленьня па барацьбе з карупцыяй.
У 2019 годзе ён узначаліў 5-е (па горадзе Менску) упраўленьне ГУБАЗіК.
Прадстаўнік Пераходнага кабінэту па аднаўленьні правапарадку і прадстаўнік BYPOL Аляксандар Азараў адзначыў у камэнтары Свабодзе, што Ананенка — давераная асоба Мікалая Карпянкова. «Калі ён быў начальнікам Пятага ўпраўленьня ГУБАЗіК, у яго ў падначаленых быў сын Карпянкова. Той жа начальнікамі для сына прызначаў правераных людзей. Тое, што яго цяпер павысілі, кажа, што давер перад Карпянковым ён апраўдаў», — кажа Азараў.
Ён дадаў, што падчас працы ў ГУБАЗіК ня чуў нэгатыўных ці карупцыйных гісторый пра Ананенку. «Быў звычайным супрацоўнікам. Наконт яго не хадзіла нейкіх плётак, нэгатыўных гісторый. Звычайны супрацоўнік, якому далі загад — ён выконвае. Такі нэўтральны чалавек, нічога благога ці добрага пра яго сказаць не магу, як памятаеце гісторыю пра шпіёна — „чалавека бяз твару“», — дадаў прадстаўнік BYPOL.
