17 верасьня ўлады Беларусі адзначаюць новае сьвята, яго прыдумалі ў 2021 годзе — Дзень народнага адзінства. У гэты дзень Аляксандар Лукашэнка зьбіраецца абвясьціць амністыю. Глядзім, колькі будзе каштаваць сьвяткаваньне.
303 тысячы даляраў на патрыятычнае шоў-форум
На 17 верасьня ўлады плянуюць правесьці «Патрыятычнае шоў-форум «Гэта наша гісторыя!» на Мінск-арэне. Згодна з сайтам дзяржаўных закупак, каштаваць гэта будзе 780 000 рублёў, або 303 000 даляраў.
На Мінск-арэне паставяць сцэну плошчай 524 квадратныя мэтры і вышынёй 1 мэтар. Падчас шоў, згодна з тэхнічным апісаньнем, будуць выкарыстоўваць спэцэфэкты: 6 дымавых гармат, 8 установак па запуску сэрпантыну, а таксама генэратар крыё-эфэкту.
Сродкі на сьвята — бюджэтныя.
Канцэрт да 3 ліпеня абышоўся ўладам больш як удвая таньней — 133 900 даляраў.
$19 400 — на выставу
Нацыянальны гістарычны музэй да Дня народнага адзінства робіць выставу — «Канцлягер Бяроза Картуская 1934–1939 гг.», каштаваць гэта будзе 50 тысяч рублёў, або 19,4 тысячы даляраў.
Сьвята ў рэгіёнах
Суправаджэньне мерапрыемстваў да Дня народнага адзінства ў Берасьці будзе каштаваць 65 000 рублёў, або 25 000 даляраў.
У Барысаве сьвяточныя мерапрыемствы да Дня народнага адзінствапацягнуць на 30 500 рублёў, або 11,8 тысячы даляраў.
У Горадні на сьвята патрацяць 9000 рублёў, або 3500 даляраў.
У Мазыры 17 верасьня прыпадае на Дзень гораду. Там сьвяточныя мерапрыемствы абыдуцца бюджэту ў 10 тысяч рублёў, або амаль 4 тысячы даляраў.
У Карэліцкім раёне да Дня народнага адзінствазакупяць банэр за 700 рублёў, або 272 даляры. Банэр будзе 7 мэтраў вышынёй і 3,5 мэтра шырынёй, з надпісам: «Дзень народнага адзінства».
