Некалькі пастоў на гэтую тэму апублікавалі ў твітэр-акаўнце апазыцыйнага палітыка.
Навальны лічыць, што пад санкцыі «пакуль трапіла мізэрная колькасьць алігархаў і карупцыянэраў». Ён адзначае ў сувязі з гэтым, што ў сьпісе Forbes 200 пазыцый, зь іх санкцыі ЭЗ, ЗША ці Вялікай Брытаніі закранулі ўсяго 46 чалавек: «На маю думку, гэта ня вельмі падобна на абвешчаную вайну супраць пуцінскіх алігархаў».
«Як толькі справа даходзіць да канкрэтнай працы, у нетрах выканаўчай улады ўсё рассыпаецца ў пыл. Проста нічога не адбываецца. Гучныя заявы лідэраў ёсьць, а рашэньні недзе затрымаюцца», — піша палітык.
У якасьці прыкладаў Навальны прыводзіць, у прыватнасьці, кіраўніка «Газпрому» Аляксея Мілера, які ня трапіў пад санкцыі ЭЗ, і Рамана Абрамовіча, які ня трапіў пад санкцыі ЗША. Акрамя таго, ён зьвяртае ўвагу на кватэру дачкі Дзьмітрыя Пяскова Лізаветы ў Парыжы, якую яна перапісала на маці, і на яхту Дзьмітрыя Мядзьведзева, перапісаную на выпадковую фірму, як на прыклады адыходу ад санкцый з дапамогай пераафармленьня ўласнасьці на сваякоў ці намінальныя фірмы. Пры гэтым апазыцыянэр таксама згадвае Уладзіміра Патаніна.
«Нумар два ў сьпісе „Форбс“ не пад санкцыямі. Алігарх Патанін усхваляе Пуціна публічна. Бравіруе тым, што санкцыі яму хоць бы што», — піша Аляксей Навальны аб прэзыдэнце «Интерроса» і кіраўніку праўленьня «Норникеля».
Вядома, што ў канцы чэрвеня санкцыі супраць мільярдэра ўвяла Вялікая Брытанія з фармулёўкай, што «Патанін працягвае назапашваць багацьце, падтрымліваючы рэжым Пуціна, набываючы „Росбанк“ і долі ў „Тинькофф Банку“ пасьля ўварваньня Расеі ва Ўкраіну».
- Пасьля таго, як Расея ў канцы лютага напала на Ўкраіну, ЗША, Вялікая Брытанія, Эўразьвяз і шэраг іншых краіны ўвялі некалькі пакетаў санкцый супраць расейскай эканомікі, фінансавай сыстэмы, буйных кампаній, алігархаў, палітыкаў, у тым ліку прэзыдэнта Ўладзіміра Пуціна, а таксама чальцоў яго сям’і і найбліжэйшага атачэньня.
- Абмежаваньні былі накладзеныя на аб’екты дарагой нерухомасьці, супэр’яхты і самалёты, якія належаць некалькім мільярдэрам. Расея ўводзіць санкцыі ў адказ, падкрэсьліваючы, што «ваенная спэцапэрацыя» ва Ўкраіне, як Масква называе ўварваньне, зьвязана з абаронай нацыянальных інтарэсаў.
- Аляксей Навальны знаходзіцца ў зьняволеньні з таго часу, як вярнуўся ў Расею зь Нямеччыны, дзе лячыўся пасьля атручэньня «Навічком». Яму спачатку замянілі на рэальны ўмоўны тэрмін у справе «Іў Рашэ», а затым судзілі ў справе аб паклёпе на вэтэрана (у ёй аштрафавалі) і ў справе аб махлярстве і абразе судзьдзі (прысудзілі 9 гадоў калёніі строгага рэжыму).
- Структуры, створаныя палітыкам у Расеі (штабы Навальнага і Фонд барацьбы з карупцыяй), прызнаны экстрэмісцкімі арганізацыямі, за ўдзел у іх паплечнікаў палітыка затрымліваюць і судзяць задняй датай.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
