Пра гэта паведамляе партал Onliner.
Сёньня напрыканцы працоўнага дня многіх беларусаў чакаў непрыемны сюрпрыз: пры аплаце ў крамах не прымалі карткі, не працавалі яны і ў многіх банкаматах. Аказалася, што гэта чарговы збой.
— Не працуе аплата карткай. Спрабаваў толькі што расплаціцца ў «Грошыку», але на касах прымаюць толькі наяўныя. Выдае «памылку сувязі», — паведамляе чытач.
Такія ж праблемы — з аплатай таксі і мэтро па картцы.
— Выклікаў «Яндэкс-таксі» пасьля працы, а сыстэма пераключыла мяне з аплаты карткай на наяўныя. Пасьля чаго ў 17:24 прайшла аплата ў адной краме, а ў іншай у 17:35 ужо не прайшла, — наракае мянчук Віктар.
— Падобна, што працэсінгавы цэнтар зламаўся. Не працуюць банкаматы і тэрміналы амаль па ўсім Менску. Як мінімум у чатырох крамах запар не працуюць тэрміналы — «Суседзі», «Ганна», «Прастор» і «Хіт». На вуліцы Дзянісаўскай у «Кароне» па гучнай сувязі абвяшчаюць, што не працуюць карткі, — паведамляе іншы чытач.
— Я ня змог аплаціць тавар у «Табакерцы» каля дому, потым зазірнуў у працоўны чат — аказваецца, не працуюць таксама карткі на АЗС далёка адсюль і ў крамах, — кажа Арцём.
Падобныя праблемы і ў банкаматах. У адных картка проста завісла, у іншых банкамат яе выплюнуў.
— Банкаматы ўсіх банкаў тупяць, грошы сьпісваюцца, але не выдаюцца, карткі ў крамах і аптэках не праходзяць. Стаяць вялізныя чэргі ў банкамат. Банкамат піша: Please wait... — і ўсё, ніякіх дзеяньняў няма, — паведамляе чытачка.
— У банкамаце ў дзяжурнай аптэцы на Коласа мужчына спрабаваў зьняць грошы ў банкамаце — не атрымалася, хлопец за ім усё ж дамогся сьпісаньня з рахунку, але банкамат проста выплюнуў картку, — кажа Антон.
Крыху пазьней чытач расказаў пра такую ж праблему, але ня ў Менску, а ў Гомлі. Мужчыну не пашанцавала яшчэ больш.
— Здымаў грошы з банкамата ў Гомлі. З рахунку грошы сышлі, але мне банкамат нічога ня выдаў. А сума немалая — 1290 рублёў. У банку сказалі, што разгляд зойме да двух працоўных дзён, — кажа Віталь.
Пацьвердзілі збой і ў ААТ «Банкаўскі працэсінгавы цэнтар» (БПЦ). Кажуць, збой зьвязаны з частковай непрацаздольнасьцю праграмна-тэхнічнага комплексу.
— Прыкладаюцца сумесныя намаганьні для аднаўленьня сэрвісу ў максымальна сьціслыя тэрміны, — паведамілі ў цэнтры.
Крыху пазьней БПЦ паведаміў, што адбыўся тэхнічны збой, зьвязаны з частковай непрацаздольнасьцю праграмна-тэхнічнага комплексу. З 18:08 усе праблемы былі выпраўленыя і «ўсё працуе ў штатным рэжыме». Многія пацьвердзілі, што па картках стала магчыма плаціць прыкладна з гэтага часу, але некаторыя чытачы і пасьля гэтага не змаглі аплаціць свае пакупкі.
Апошні буйны збой у Банкаўскім працэсінгавым цэнтры адбыўся раніцай 31 траўня. Тады таксама не працавалі карткі. Што менавіта стала прычынай збою, не паведамлялася.
