Прычынай называецца немагчымасьць гарантаваць якасную падрыхтоўку да конкурсу і бясьпеку ўсіх арганізатараў і ўдзельнікаў у сувязі з расейскай агрэсіяй.
Арганізатары зьвярнуліся да Вялікай Брытаніі, каб абмеркаваць магчымасьць правядзеньня конкурсу там, бо прадстаўнік гэтай краіны заняў другое месца.
На конкурсе «Эўравізія» ў 2022 годзе, які праходзіў у італьянскім Турыне, перамог украінскі гурт Kalush Orchestra з песьняй «Стэфанія». Па традыцыі конкурсу, налета ён мусіў праходзіць у краіне-пераможцы.
У сувязі з вайной ва Ўкраіне Вялікая Брытанія, Польшча і Гішпанія заявілі, што гатовы заняцца арганізацыяй конкурсу ў сябе ў выпадку, калі Ўкраіне ня ўдасца гэтага зрабіць, аднак у Кіеве выключылі такі варыянт, што ўкраінцы адмовяцца ад арганізацыі «Эўравізіі». Ва Ўкраіне ўжо стартавала падрыхтоўка да правядзеньня «Эўравізіі-2023». З улікам ваеннага становішча да працэсу вырашылі прыцягнуць Міністэрства абароны і Міністэрства ўнутраных спраў Украіны.
