У частцы дакладу, якая тычыцца Беларусі, гаворыцца аб тым, што сілавыя структуры «агрэсіўна, наўмысна і рэгулярна зьдзяйсьняюць злоўжываньні для задушэньня палітычнага іншадумства і рэпрэсій у дачыненьні да праваабаронцаў, актывістаў грамадзянскай супольнасьці, журналістаў і іншых асоб».
Таксама ў справаздачы гаворыцца аб мэтанакіраванай арганізацыі ўладамі Беларусі ўезду ў краіну тысяч мігрантаў і зьвязаным зь' ім міграцыйным крызісе на межах з Польшчай, Літвой і Латвіяй.
«Беларусь — аўтарытарная дзяржава. Канстытуцыя прадугледжвае непасрэдна абранага прэзыдэнта, які зьяўляецца кіраўніком дзяржавы, і двухпалатны парлямэнт, Нацыянальны сход. Прэм’ер-міністар, які прызначаецца прэзыдэнтам, зьяўляецца намінальным кіраўніком ураду, але ўлада канцэнтруецца ў прэзыдэнцкай пасадзе, як фактычна, так і юрыдычна. Грамадзяне не змаглі выбраць свой урад шляхам свабодных і сумленных выбараў. З 1994 году Аляксандр Лукашэнка замацаваў сваю ўладу над усімі інстытутамі і падарваў вяршэнства закону аўтарытарнымі сродкамі, у тым ліку маніпуляванымі выбарамі і адвольнымі дэкрэтамі. Усе выбары пасьля 1994 году, уключаючы прэзыдэнцкія выбары ў жніўні 2020 году і выбары ў Нацыянальны сход 2019 году, не лічыліся свабоднымі і справядлівымі», — гаворыцца ў высновах дакладу.
Істотнымі праблемамі ў галіне правоў чалавека таксама названыя:
- незаконныя або адвольныя забойствы з боку сілавікоў;
- катаваньні ў месцах зьняволеньня і выпадкі жорсткага абыходжаньня;
- цяжкія і небясьпечныя для жыцьця ўмовы ўтрыманьня ў турмах;
- адвольныя арышты і затрыманьні;
- палітычна матываваныя рэпрэсіі;
- сур’ёзныя праблемы зь незалежнасьцю судовай сыстэмы;
- адвольным або незаконным умяшаньні ў прыватнае жыцьцё;
- сурʼёзныя абмежаваньні свабоды слова і СМІ;
- сурʼёзныя абмежаваньні свабоды інтэрнэту;
- істотнае ўмяшаньне ў свабоду мірных сходаў і свабоду асацыяцыі;
- абмежаваньні свабоды перамяшчэньня і права пакідаць краіну;
- прымусовае вяртаньне і жорсткае абыходжаньне зь мігрантамі.
«Улады на ўсіх узроўнях у цэлым дзейнічалі беспакарана па ўказаньні Лукашэнкі і рэгулярна не рабілі захадаў у перасьледзе або пакараньні службовых асобаў ураду або сіл бясьпекі, якія ўчынілі парушэньні правоў чалавека», — заяўляюць аўтары справаздачы аб Беларусі.
