У пастанове суда гаворыцца, што 7 красавіка Дзьмітрыеў стаяў у вэстыбюлі станцыі мэтро «Парнас» з плякатам, на якім было напісана: «Вайна прынесла столькі невыносных выпрабаваньняў, гора і сьлёз, што забыць гэта немагчыма. І няма прабачэньня і апраўданьня тым, хто зноў задумвае агрэсіўныя пляны».
Мужчыну затрымалі, ён правёў ноч у аддзеле паліцыі. Суд палічыў, што Дзьмітрыеў «фармаваў меркаваньне аб удзеле Ўзброеных сіл Расеі ў вайне, а не ў спэцыяльнай вайсковай апэрацыі, чым скажаў і дыскрэдытаваў задачы па выкарыстаньні Ўзброеных сіл за межамі РФ».
Кур’ёз сытуацыі ў тым, што, паводле Дзьмітрыева, на плякаце ён напісаў цытату Ўладзіміра Пуціна, якую ён вымавіў на Парадзе Перамогі 9 траўня 2021 году. Гэта пацьвярджае і адпаведная расшыфроўка з выступу пуціна на сайце Крамля.
- Пуцін падпісаў закон пра «фэйкі» аб расейскай арміі 4 сакавіка. За яго парушэньне грамадзянам РФ пагражае штраф да 5 млн расейскіх рублёў ці пазбаўленьне волі на тэрмін да 10 гадоў. Калі «распаўсюджваньне фэйкаў» пацягнула цяжкія наступствы, тэрмін пазбаўленьня свабоды складзе ад 10 да 15 гадоў.
- Таксама ўнесеныя зьмены ў расейскі Кодэкс аб адміністрацыйных парушэньнях: новы артыкул аб «публічных дзеяньнях, накіраваных на дыскрэдытацыю выкарыстаньня» расейскай арміі прадугледжвае штраф да 100 тысяч рублёў (для службовых асобаў — да 300 тысяч, для юрыдычных — да аднаго мільёна рублёў).
- Да канца сакавіка ў Расеі было складзена больш за 220 пратаколаў па артыкуле аб «дыскрэдытацыі» расейскай арміі.
