Украінскія генэралы, якія адказваюць за абарону Кіева, расказалі ВВС, як іх сілы змагаюцца, каб стрымаць расейскую артылерыю, і патлумачылі моцныя бакі гораду ў вайне супраць расейскіх войскаў.
Кіеў усё больш адчувае жорсткасьць вайны і разбурэньняў ад нападаў расейскіх войскаў. Раніцай у панядзелак расейская ракета трапіла ў дзевяціпавярховы жылы дом — загінуў як мінімум адзін чалавек, разбураны сам будынак і дзясяткі ўкраінцаў засталіся бяз даху над галавой.
На шчасьце, многія жыхары былі ў сховішчах, інакш ахвяр было б значна больш. 15 сакавіка зноў быў абстрэл шматпавярховікаў — двое загінулі.
Цэнтар Кіева і многія яго прыгарады расейскія атакі пакуль не закранулі, а вось іншыя ўкраінскія гарады зазнаюць масіраваны артылерыйскі абстрэл, ёсьць шмат ахвяр.
Мэр Кіева Віталь Клічко абвясьціў двухдзённую камэнданцкую гадзіну да раніцы 17 сакавіка, а таксама заклікаў кіяўлян-мужчын вярнуцца для абароны сталіцы. Вядома, што захоп сталіцы Ўкраіны — адна з галоўных мэтаў расейскага ўварваньня.
Рэкі і тарфянікі дапамагаюць у абароне
Генэралы, адказныя за абарону Кіева, заявілі, што робяць усё магчымае, каб стрымаць расейскую артылерыю, але прызналі, што сталіца ўразьлівая для ракет.
Аднак рэльеф гораду і мясцовасьці граюць на руку ўкраінскім сілам, сказаў генэрал Андрэй Крышчанка. Горад вялікі і прасторны. Яго перасякаюць рэкі, прычым ня толькі магутны Дняпро, які дзеліць Кіеў на дзьве часткі, але і яго прытокі.
«З аднаго боку, цяжка абараняцца, улічваючы, што Кіеў вельмі вялікі, — сказаў ён. — Але, з другога боку, гэта плюс. Рэкі, масты на подступах да гораду. Нашы войскі будуюць абарону і ўмацаваньні».
«Вакол гораду шмат невялікіх рэк, якія ўпадаюць у Дняпро, шмат тарфяных балот, таму мясцовасьць непрыдатная для маштабнага перамяшчэньня войскаў».
Яшчэ адна перавага, па словах генэрала, — тое, што Кіеў — прамысловы горад, з майстэрнямі і фабрыкамі. Іх перапрафілявалі, каб вырабляць рэчы, неабходныя для ўмацаваньняў — бэтонныя блёкі, мяшкі зь пяском і супрацьтанкавыя загароды.
Генэралы Крышчанка і Князеў патлумачылі, што спынілі наступ ворага на двух галоўных напрамках — з усходу і з паўночнага захаду. У прыватнасьці, быў спынены рух вядомай расейскай вайсковай калёны даўжынёй 64 км, якую фіксавалі на поўнач ад Кіева ў першыя дні вайны.
Па словах генэралаў, дзякуючы атакам украінскіх Узброеных сілаў калёна распылілася па навакольных лясах і пакуль не становіць пагрозы.
У цэнтры ўвагі расейцаў па-ранейшаму застаюцца навакольлі сталіцы ў паўночна-заходнім напрамку. Генэрал Князеў паказвае на бліжэйшыя навалы сіл расейскай пяхоты на другім беразе ракі Ірпень, прыкладна за 20 км ад цэнтру Кіева.
Украінцы добра ўмацаваліся і разбурылі стратэгічна важныя масты
«Тут забалочаныя нізіны, і расейскія сілы ня могуць іх прайсьці. Калі б не ўкраінскія салдаты, яны б проста перакінулі праз раку пантонную пераправу. Але мы там і хочам іх зьнішчыць», — кажа генэрал Князеў.
Пакуль журналіст ВВС размаўляў з генэраламі, раздаўся яшчэ адзін выбух.
«Чуеце, — кажа малодшы афіцэр, — гэта наша СПА зьбіла яшчэ адну».
Украінскія ваенныя посьпехі зьдзівілі іх сяброў і ворагаў. Прэзыдэнт Зяленскі і яго камандзіры больш чым задаволеныя дзеяньнямі сваёй арміі і тысяч добраахвотнікаў. Аднак расейцы пакуль ня кінулі на ўкраінскую сталіцу ўсю сваю вайсковую моц.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
