Харкаў, Чарнігаў, Марыюпаль, Херсон, Гастомель і Валнаваха атрымаюць званні «горад-герой»
Пра гэта заявіў прэзыдэнт Украіны Ўладзімір Зяленскі ў відэазвароце.
Ганаровае званьне ўводзіцца «з мэтай адзначэньня подзьвігу, масавага гераізму і стойкасьці грамадзянаў, што праявіліся ў абароне сваіх гарадоў падчас адпору ўзброенай агрэсіі Расейскай Фэдэрацыі супраць Украіны».
Дэлегацыя Ўкраіны: згода немагчымая толькі аб тэрыторыях
Удзельнік украінскай дэлегацыі на перамовах з Расеяй, кіраўнік фракцыі «Слуга народу» ў Вярхоўнай Радзе Давід Арахамія, заявіў, што «адзіныя пытаньні, па якіх практычна немагчымая згода» з расейскім бокам — гэта «прызнаньне [расейскай прыналежнасьці] Крыму» і незалежнасьці так званых Данецкай і Луганскай «народных рэспублік».
Гаворачы аб іншых патрабаваньнях Расеі — у прыватнасьці, аб нэўтральным вайсковым статусе Ўкраіны — Арахамія сказаў, што NATO не гатовая абмяркоўваць уступленьне яго краіны ў свае шэрагі ў бліжэйшыя 5-10 гадоў, а сама Ўкраіна «ня будзе змагацца за заяўку на ўступленьне».
У Беларусі і Расеі закрыюць крамы Tommy Hilfiger і Calvin Klein
Кампанія PVH Corp., якая валодае сярод іншага брэндамі моднага адзеньня Tommy Hilfiger і Calvin Klein, абвясьціла, што з 7 сакавіка часова закрывае ўсе свае крамы ў Расеі і Беларусі.
TikTok прыпыняе працу ў Расеі з прычыны новых паправак у расейскае заканадаўства аб «фэйкавых навінах»
«Бясьпека нашых супрацоўнікаў і карыстальнікаў застаецца нашым галоўным прыярытэтам. У сьвятле новага расейскага закону аб “фэйкавых навінах” у нас няма іншага выбару, акрамя як прыпыніць прамую трансьляцыю і новы кантэнт для нашага відэасэрвісу, пакуль мы разглядаем наступствы гэтага закону для бясьпекі. Наша служба абмену паведамленьнямі ў аплікацыі ня будзе закранутая», — гаворыцца ў заяве прэс-службы сэрвісу TikTok.
4 сакавіка Дзяржаўная дума Расеі прыняла законапраект аб крымінальнай адказнасьці за так званыя «фэйкі» аб дзеяньнях расейскіх Узброеных сілаў ва Ўкраіне. Людзям можа пагражаць да 15 гадоў турмы.
American Express прыпыніла працу ў РФ і Беларусі
Амэрыканская фінансавая кампанія American Express прыпыніла аказаньне паслугаў на тэрыторыі Расеі і Беларусі.
Як падкрэсьліваецца ў дакумэнце, у сувязі з падзеямі вакол Украіны American Express прыпыняе «усе апэрацыі ў Расеі». «Выдадзеныя ва ўсім сьвеце карты American Express больш ня будуць працаваць у банках і банкаматах у Расеі», — тлумачыцца ў заяве. «Мы таксама спыняем усе дзелавыя апэрацыі ў Беларусі», — падкрэсьлілі ў кампаніі.
У Харкаве нанесьлі авіяўдар па тэлевышцы
Пасьля ўдару расейскай авіяцыі па тэлевізійнай вышцы сёньня ўвечары ў горадзе перастала працаваць тэлебачаньне, піша «Українська правда».
Некалькі дзён таму падчас удару па тэлевышцы ў Кіеве, паводле зьвестак украінскіх уладаў, загінулі 5 чалавек.
У размове з Джонсанам Зяленскі дамовіўся аб «наступных супольных кроках» у процідзеяньні расейскай агрэсіі
Прэзыдэнт Украіны Уладзімір Зяленскі абмеркаваў з прэм'ер-міністрам Вялікабрытаніі Борысам Джонсанам далейшае ўзмацненьне санкцый супраць Расеі і наступныя супольныя крокі.
«Працягнуў дыялёг з прэм'ер-міністрам Вялікабрытаніі Борысам Джонсанам. Паінфармаваў аб супрацьдзеяньні агрэсару. Асудзілі ядзерны тэрарызм і ваенныя злачынствы РФ. Абмеркавалі далейшае ўзмацненьне санкцый супраць Расеі і дамовіліся аб наступных супольных кроках», — напісаў Зяленскі ў Твітэры 6 сакавіка.
Людзі з усяго сьвету дапамагаюць украінцам праз Airbnb
Жыхары розных краін сьвету ў апошнія тры дні далучыліся да акцыі дапамогі ўкраінцам праз сетку Airbnb. Яны браніруюць кватэры на онлайн-пляцоўцы кампаніі, аплочваюць іх, але не засяляюцца.
Такім чынам у арандаванай кватэры бясплатна можа жыць любы грамадзянін Украіны, які мае ў гэтым патрэбу.
Заснавальнік Airbnb, амэрыканец Браян Чэскі 4 сакавіка паведаміў, што за двое сутак людзі ў межах гэтай ініцыятывы даслалі ўкраінцам ужо амаль 2 млн даляраў.
Блінкен: Краіны NATO маюць ад ЗША «зялёнае сьвятло» на пастаўкі самалётаў-зьнішчальнікаў ва Ўкраіну
Пра гэта паведаміў дзяржаўны сакратар ЗША Энтані Блінкен.
У небе над Харкавам зьбіты расійскі самалёт
Паводле кіраўніка Харкаўскай аблдзяржадміністрацыі Алега Сінягубава, каля 18.15 падразьдзяленьне Нацыянальнай гвардыі Ўкраіны зьбіла з зэнітна-ракетнага комплексу зьнішчальнік Су-25 у раёне ХТЗ.
Пілот не пасьпеў катапультавацца і загінуў на месцы.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, пакуль немагчымая.
За дні вайны загінулі ўжо мінімум 364 мірныя жыхары Ўкраіны, а 759 чалавек атрымалі раненьні
Пра гэта гаворыцца ў апублікаванай у нядзелю зводцы ААН.
Такім чынам, за суткі, якія прайшлі з публікацыі папярэдняй зводкі апарата Вярхоўнага камісара ААН па правах чалавека, у сьпіс дадаліся 13 загінуўшых і 52 параненых.
У Харкаве расейская армія абстраляла з «Градаў» навуковы цэнтар зь ядзернай устаноўкай — СБУ
6 сакавіка расейская армія абстраляла з рэактыўных сыстэм залпавага агню «Град» Харкаўскі фізыка-тэхнічны інстытут (ХФТІ), дзе знаходзіцца ядзерны навукова-дасьледчы комплекс, паведамляе Служба бясьпекі Ўкраіны Харкаўскай вобласьці.
37 ядзерных паліўных элемэнтаў загружаныя ў ядро дасьледчай базы, удакладняюць у СБУ.
«Зьнішчэньне ядзернай устаноўкі і сховішчаў ядзерных матэрыялаў можа прывесьці да маштабнай экалягічнай катастрофы», — адзначылі ў СБУ.
Украіна зьвярнулася да краін G7 з просьбай спыніць сяброўства Расеі і Беларусі ў МВФ і арганізацыях Сусьветнага банку
Пра гэта заявіў прэм’ер-міністар Украіны Дзяніс Шмыгаль.
«Гэтыя дзьве краіны парушылі свае абавязаньні і накіравалі сваю палітыку на вайну», – адзначыў Шмыгаль.
У Краматорску на Данбасе абстралялі жылы дом
Паводле папярэдняй вэрсіі, гэта была расейская крылатая ракета. Загінулі два чалавекі, паведамляе Донбасс.Реалии
Мінабароны Расеі заявіла, што будзе наносіць удары па вайсковых прадпрыемствах ва Ўкраіне
Паведамляецца, што ўдары будуць наносіцца высокадакладнай зброяй.
Найбуйнейшы вытворца графічных працэсараў Nvidia заявіў аб спыненьні продажаў усіх прадуктаў кампаніі ў Расеі
Прадстаўнік Nvidia удакладніў, што забарона распаўсюджваецца на ўсе прадукты кампаніі. Ці патрапяць пад яе графічныя працэсары Nvidia вытворчасьці іншых пастаўшчыкоў, такіх як Gigabyte, MSI і Asus – пакуль невядома.
Лідэр гурту «Океан Ельзи» Сьвятаслаў Вакарчук далучыўся да тэрытарыяльнай абароны Львоўшчыны
Пра гэта паведаміў дэпутат Львоўскай абласной рады Аляксандар Цішчанка.«Афіцэр запасу, ганаровы грамадзянін горада Львова, музыкант, лідэр гурту «Океан Ельзи» Сьвятаслаў Вакарчук папоўніў шэрагі абаронцаў Украіны! З сёньняшняга дня ў складзе тэрытарыяльнай абароны Львоўскай вобласьці ён пачынае выконваць свой вайсковы абавязак», – напісаў у фэйсбуку Цішчанка.
Ад пачатку расейскага нападу больш як 140 тысяч украінцаў вярнуліся ва Ўкраіну
Ад пачатку расейскай агрэсіі толькі заходні ўчастак дзяржаўнай мяжы Ўкраіны перасеклі больш за 1 млн 50 тысяч чалавек, паведамляе МУС Украіны
Зь іх на выезд з краіны накіраваліся больш за 900 тысяч чалавек — амаль 764 тысячы грамадзян Украіны і каля 137 тысяч іншаземцаў.
У той жа час ва Ўкраіну вярнуліся 143 тысячы чалавек, 80% зь іх — мужчыны.
Таксама Дзяржаўная памежная служба Ўкраіны забясьпечыла пропуск 2 450 аўтамабіляў з гуманітарнай дапамогай, накіраванай з-за мяжы.
І на Чарнобыльскай, і на Запароскай АЭС да гэтага часу расейскія войскі. Украінскі бок кажа, што там тэрарызуюць пэрсанал
Пра гэта заявіў Пятро Коцін, кіраўнік кампаніі «Энергаатам».
«Акупанты цяпер на Запароскай станцыі маюць 500 сваіх вайскоўцаў. На Чарнобыльскую станцыю, па нашай інфармацыі, прыбыла яшчэ тысяча. Яны адтуль ня сыдуць. Яны пра гэта прама кажуць нашаму пэрсаналу: „Рабіце тое, што мы кажам вам. Інакш апыняцеся ў трунах“. Так яны тэрарызуюць наш пэрсанал. Увесь мэнэджмэнт станцыі працуе пад камандаваньнем вайсковага камандзіра РФ, які дае ім загады».
Сэрвісы Apple Pay і Google Pay для картак Visa і Mastercard, выпушчаных расейскімі банкамі, неўзабавае стануць недаступныя праз санкцыйныя абмежаваньні
Пра гэта піша ТАСС са спасылкай на паведамленьне «Банку Расеі».