Ад абстрэлу тэлевежы ў Кіеве загінулі 5 чалавек. Яшчэ 5 атрымалі раненьні
Пра гэта паведамляе ўкраінская дзяржаўная служба надзвычайных сытуацыяў.
Таксама ў 17:10 снарад, накіраваны на тэлевізійную вежу ў Кіеве, упаў на адлегласьці 200 мэтраў ад тэрыторыі Бабінага Яру. Пра гэта паведаміла Аб’яднаная габрэйская грамада Ўкраіны.
У Бабіным Яры пахавана больш за 100 000 кіяўлян — ахвяраў нацызму, пераважная большасьць іх былі габрэямі.
Маскоўскую радыёстанцыю «Эхо Москвы» ўлады Расеі адключылі ад эфіру.
Пра гэта паведаміў галоўны рэдактар радыё Аляксей Венядзіктаў.
Раней Генэральная пракуратура Расеі запатрабавала абмежаваць доступ да сайтаў «Эха Москвы» і тэлеканалу «Дождь», паведамляе РБК. Пазьней зьявілася інфармацыя, што амаль усе апэратары ў Расеі ўжо выканалі гэтае патрабаваньне.
Беларусь і Расею адхілілі ад усіх камандных спаборніцтваў па тэнісе
Міжнародная фэдэрацыя тэнісу (ITF) адхіліла Беларусь і Расею ад сяброўства ў арганізацыі і забараніла ўдзел у камандных спаборніцтвах.
Таксама адменены турніры ў гэтых краінах, паведамляе прэс-служба ITF.
Пры гэтым беларускім і расейскім спартоўцам дазволена ўдзельнічаць у індывідуальных спаборніцтвах Асацыяцыі тэнісістаў-прафесіяналаў (ATP) і Жаночай тэніснай асацыяцыі (WTA).
Лукашэнка заявіў, што ўкраінскія ракеты маглі паляцець «у Гомель і Мазыр»
Дзяржаўнае інфармагенцтва БелТА падрабязна пераказала асноўныя моманты прамовы Аляксандра Лукашэнкі на нарадзе з чальцамі Савету бясьпекі, у якой ён спрабаваў патлумачыць сваю падтрымку нападу Расеі на Ўкраіну.
Лукашэнка імкнуўся акцэнтаваць увагу на пагрозах для Беларусі, якія, на ягоную думку, ішлі з тэрыторыі Ўкраіны. Сярод іншага, ён заявіў, што Расея нанесла «апераджальны ўдар» і што «калі б гэтага не зрабілі, гэтыя ракеты прыляцелі б у Гомель і Мазыр».
Дзяржсакратар ЗША паставіў пад пытаньне сяброўства Расеі ў Радзе ААН у правах чалавека
Дзяржаўны сакратар ЗША Энтані Блінкен паставіў пад пытаньне сяброўства Расеі ў Радзе ААН у правах чалавека пасьля расейскага ўварваньня на тэрыторыю Ўкраіны.
У відэазвароце да Рады ААН Блінкен назваў дзеяньні Масквы на тэрыторыі суседняй дзяржавы жудасным парушэньнем правоў чалавека.
МЗС Польшчы ініцыяваў працэс адабраньня расейскай нерухомасьці ў Варшаве
У тым ліку, будынка школы пры пасольстве, гаворыцца ў заяве ведамства.
МУС Украіны: На ўсходзе краіны без электрычнасьці і харчаваньня засталіся амаль 40 тысяч чалавек
Праз агрэсію Расеі на ўсходзе Украіны каля 40 тысяч чалавек засталіся без сьвятла і харчаваньня, а расейскія вайскоўцы перашкаджаюць эвакуацыі мясцовага насельніцтва, паведаміў міністар унутраных спраў Украіны Дзяніс Манастырскі.
Эўразьвяз дамовіўся адключыць ад SWIFT сем расейскіх банкаў, а таксама накласьці санкцыі на RT і «Спутник»
Амбасадары Эўразьвязу дамовіліся адключыць ад SWIFT сем расейскіх банкаў, а таксама ўхвалілі санкцыі супраць расейскіх мэдыя-карпарацый RT і «Спутник».
Паводле інфармацыі, якую атрымала Радыё Свабода гаворка ідзе пра банкі ВТБ, ВЭБ.РФ, «Открытие», «Новикомбанк», «Промсвязьбанк», «Совкомбанк» і «Банк Россия».