Лінкі ўнівэрсальнага доступу

Пад Харкавам украінская армія зьнішчыла расейскія «Грады». Расейцы абстрэльваюць цэнтар і жылыя масівы гораду

абноўлена

Адзін са зьнішчаных расейскіх «Градаў» пад Харкавам, 25 лютага 2022
Адзін са зьнішчаных расейскіх «Градаў» пад Харкавам, 25 лютага 2022

Расейскія войскі працягваюць абстрэльваць Харкаў. Зацятыя баі з ночы трываюць у 16-кілямэтровым поясе вакол гораду.

«З ночы пэрыядычна абстрэльваюць Харкаў. Снарады знайшлі ў самым цэнтры гораду — каля Коннага рынку, там побач акадэмія Нацыянальнай гвардыі. Абстралялі авіязавод», — сказала Свабодзе мясцовая жыхарка Мар’яна.

Жанчына кажа, што цяпер хаваецца ў падвале ўласнага будынку. «Вулічных баёў у Харкаве няма. Расейцы не змаглі зайсьці ў горад. Непадалёк нашы зьнішчылі расейскі „Грады“. Моцныя баі ідуць пад Харкавам — за Дзергачы (за 16 км ад гораду. — РС) і за Печанегі (за 60 км. — РС), там падарвалі дамбу — нібыта нашыя, каб акупанты не прайшлі», — паведаміла Мар’яна.

Зьнішчаная тэхніка расейцаў пад Харкавам
Зьнішчаная тэхніка расейцаў пад Харкавам
Зьнішчаны абаронцамі Харкава расейскі «Град»
Зьнішчаны абаронцамі Харкава расейскі «Град»

Паводле яе, на вуліцах няшмат людзей. «Панікі няма. Шмат людзей сёньня начавалі ў мэтро і падвалах. Крамы працуюць, і аптэкі таксама працуюць, але вялікія чэргі. Мой муж хадзіў па лекі, то прастаяў у чарзе больш за гадзіну».

Мар’яна кажа, што ў мясцовыя лякарні за апошнія суткі шпіталізавалі 47 асобаў, у тым ліку 8 вайскоўцаў. «Так паведамілі гарадзкія ўлады. Кажуць, што ў цяжкім стане знаходзяцца двое дзяцей — дзяўчынка, параненая ў Куп’янску, і хлопчык з Чугуева».

Таксама Мар’яна паведаміла, што абстралялі Харкаўскі авіяцыйны завод.

Пад горадам — спаленыя расейскія «Грады». Знойдзена цела расейскага вайскоўца.

Захопнікі, згодна з інфармацыяй Узброеных сілаў Украіны, нясуць вялікія страты на кірунках, куды спрабуюць прабіцца. Толькі за першы дзень расейцы страцілі больш за 400 чалавек асабовага складу, а таксама дзясяткі адзінак тэхнікі.

Напад Расеі на Ўкраіну

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
  • Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
  • 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
  • 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG