Лідэр дэпутацкай фракцыі партыі «Слуга народа» ў Вярхоўнай Радзе Давід Арахамія, накіраваны 28 лютага для ўдзелу ў перамовах з Расеяй на ўкраінска-беларускай мяжы, на рацэ Прыпяці, паведаміў пра пазыцыю, зь якой ён зьбіраецца выступіць.
«Перамовы пойдуць альбо ў патрэбным Украіне кірунку, альбо як расейскі баявы карабель (г. зн. прапановы будуць адхіленыя — Рэд.)», — напісаў Арахамія ў ноч на 28 лютага.
Арахамія мае ўвазе адказ абаронцаў вострава Зьмяіны на ўльтыматум расейскім караблям, якія атачылі яго і прапанавалі здацца: «Русский военный корабль, ідзі на ...».
Адказваючы на камэнтарыі ў Facebook, Арахамія напісаў: «Мы выслухаем прапановы. А потым будзем абмяркоўваць, варта гэта ці не».
Чакаецца, што перамовы пачнуцца раніцай 28 лютага.
Як рыхтуюцца перамовы
27 лютага, агучваючы пасьля размовы з Аляксандрам Лукашэнкам, прэзыдэнт Украіны Ўладзімір Зяленскі заявіў: «Лукашэнка папрасіў, каб украінская і расейская дэлегацыі сустрэліся на рацэ Прыпяць. Падкрэсьліваю — без усялякіх умоваў. Скажу шчыра, як заўсёды, — я ня вельмі веру ў вынік гэтай сустрэчы, але няхай паспрабуюць».
Прэзыдэнт Украіны дадаў, што ня супраць такой сустрэчы, каб «тады ні ў воднага грамадзяніна Украіны не было сумненьняў у тым, што я як прэзыдэнт не спрабаваў спыніць вайну, калі быў маленькі, але ўсё ж шанец».
Раней 27 лютага Зяленскі заявіў, што Лукашэнка ўзяў на сябе адказнасьць за тое, каб усе самалёты, верталёты і ракеты, якія знаходзяцца ў Беларусі, заставаліся на зямлі падчас паездкі, перамоў і вяртаньня ўкраінскай дэлегацыі.
Паводле яго, мінулая ноч «была цяжкай».
Чаму Ўкраіна адмовілася ад Менска і Гомля як пляцоўкі прерамоваў
На другі дзень расейскага ўварваньня прэсавы сакратар прэзыдэнта Ўкраіны Ўладзіміра Зяленскага Сяргей Нікіфараў заявіў, што Ўкраіна не адмаўлялася ад перамоваў з Расеяй і што бакі кансультуюцца наконт месца і часу перамоўнага працэсу.
25 лютага ў Крамлі заявілі, што Пуцін гатовы накіраваць у Менск дэлегацыю на ўзроўні прадстаўнікоў Мінабароны, МЗС і Адміністрацыі прэзыдэнта для правядзеньня перамоў з украінскім бокам. Потым яны накіравалі такую дэлегацыю ў Гомель, але Ўкраіна на паслала сваіх прадстаўнікоў, бо зь Беларусі ідзе агрэсія супраць Расеі.
27 лютага прэс-сакратар прэзыдэнта Ўладзіміра Зяленскага Сяргей Нікіфараў заявіў, што на перамовах у Гомелі, куды прыбыла расійская дэлегацыя, не будзе прадстаўнікоў Украіны.
«Мы таксама чулі заявы, што расейская дэлегацыя прыбыла ў Гомель на перамовы. Трэба сказаць, што прадстаўнікоў Украіны там ня будзе. Гэты фармат сапраўды абмяркоўваўся. Але ў апошні момант расейскія перамоўшчыкі запатрабавалі ад украінскай арміі спачатку скласьці зброю. Пры гэтым ім адразу ж паступіла прапанова пайсьці за „расейскім караблём“. Таму іх цяперашнія заявы і рашэньні, нягледзячы ні на што, дэманстратыўна ехаць у Гомель — гэта толькі інфармацыйны ціск і спроба перакласьці адказнасьць за правал на Украіну. Гэта няпраўда», — сказаў прэс-сакратар.
Прэзыдэнт Украіны Уладзімір Зяленскі 27 лютага заявіў, што Менск не можа быць пляцоўкай для перамоваў аб спыненьні вайны Расіі супраць Украіны і што перамовы павінны адбывацца ў любым іншым горадзе «ў краіне, дзе не лятаюць ракеты».
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
