Удар расейцаў па аэрадроме ў Луцку
Мінабароны Расеі заяўляе пра перамогу над украінскімі СПА
«Сродкі супрацьпаветранай абароны Ўзброеных сіл Украіны зьнішчаны. Вайсковая інфраструктура авіябазаў Узброеных сіл Украіны выведзена са строю». РБК цытуе заяву Мінабароны РФ. Пры гэтым сайт Міністэрства абароны краіны-агрэсара недасяжны.
Людзі выяжджаюць з Кіеву
Карэспандэнт Свабоды паведамляе: у Кіеве закрылі школы і дзіцячыя садкі. Лякарні працуюць ва ўзмоцненым рэжыме. Паралізаваныя запраўкі ў Кіеве, на выездах са сталіцы - заторы. "Укрзалізниця" паведаміла, што ўсе цягнікі з Кіева і ў Кіеў, а таксама цягнікі захаднага накірунку курсуюць паводле графіку.
Змаганьне з кібэратакамі
Міністар лічбавай трансфармацыі Ўкраіны Міхайла Фёдараў паведаміў, што ўкраінцы ўсю ноч змагаліся з кібэратакамі.
«Атакі на ўсе асноўныя інфармацыйныя рэсурсы адбываліся і адбываюцца няспынна. Цяпер усё стабільна. Усе каманды на месцы. Захоўвайце спакой і не панікуйце».
У Луцку ў выніку абстрэлаў пацярпеў адзін ратавальнік, абстрэл вайсковых частак
Памежнікі ўдакладняюць інфармацыю аб пацярпелых. Паводле Дзяржаўнай службы Ўкраіны ў пытаньнях надзвычайных сытуацый, у выніку абстрэлаў гараць вайсковыя склады ў Радушніцы Палтаўскай вобласьці і Разсошкавым Чаркаскай вобласьці.
Абстралялі вайсковую частку ў Камянцы Львоўскай вобласьці. У Іўніцы Жытомірскай вобласьці і ў Івана-Франкоўску снарады трапілі ў вайсковыя часткі.
Харкаў абстралялі «Сьмерчамі»
Расея ўчыніла вайсковае злачынства, абстраляўшы Харкаў ракетнымі сыстэмамі залпавага агню, — Conflict Intelligence Team.
Вярхоўная Рада Ўкраіны падтрымала ваеннае становішча
Вярхоўная Рада Ўкраіны падтрымала ініцыятыву прэзыдэнта Ўладзіміра Зяленскага аб ўвядзеньні ваеннага становішча. Найбліжэйшым часам ён падпіша адпаведны ўказ.Згодна з украінскім заканадаўствам, на час дзеяньня ваеннага становішча могуць абмяжоўвацца канстытуцыйныя правы і свабоды грамадзян, прадугледжаныя 12-цю артыкуламі Канстытуцыі Ўкраіны.
Уладзімір Зяленскі заклікаў да стварэньня антыпуцінскай кааліцыі
Прэзыдэнт Украіны Ўладзімір Зяленскі правёў перамовы з прэзыдэнтам ЗША Джозэфам Байдэнам, канцлерам Нямеччыны Олафам Шольцам, прэзыдэнтам Польшчы Анджэем Дудам і прэм’ер-міністрам Брытаніі Борысам Джонсанам.
«Заклікаю тэрмінова спыніць Пуціна, вайну супраць Украіны і сьвету. Будуем антыпуцінскую кааліцыю. Тэрміновыя санкцыі, абарончая і фінансавая падтрымка Ўкраіны. Закрыцьцё паветранай прасторы! Сьвет мусіць прымусіць Расею да міру», – напісаў Уладзімір Зяленскі ў Twitter.
Вайсковая тэхніка на мяжы Беларусі — Расеі — Украіны
Відэа Памежнай службы Ўкраіны.
МУС Украіны: расейская вайсковая тэхніка рухаецца з Крыму
Памежная служба Украіны паказала калёну расейскай тэхнікі, якая праходзіць праз памежны пераход у Крыме на матэрыковую частку Ўкраіны.
Кулеба: Пуцін напаў, але ніхто не разьбягаецца
Міністар замежных справаў Украіны Дзьмітро Кулеба зьвярнуўся да ўкраінскіх супольнасьцяў па ўсім сьвеце.
«Пуцін напаў, але ніхто не ўцякае. Армія, дыпляматы, усе працуюць. Украіна ваюе. Украіна будзе абараняцца. Украіна пераможа. Распаўсюджвайце праўду пра ўварваньне Пуціна ў сваіх краінах і заклікайце ўрады прыняць неадкладныя захады».
Першыя ахвяры і параненыя ў вайне Расеі супраць Украіны
Дарадца міністра ўнутраных спраў Антон Герашчанка паведаміў аб першых ахвярах. Адзін чалавек загінуў, яшчэ адзін паранены ў Браварах Кіеўскай вобласьці.
Украіна паведамляе пра зьбітыя расейскія самалёты, Расея абвяргае
У Генштабе Ўкраіны паведамілі, што Ўзброеныя сілы зьбілі на Данбасе 5 расейскіх самалётаў і верталёт.
Раней Узброеныя сілы Ўкраіны паведамлялі, што на ўсходзе краіны зьбілі расейскі франтавы бамбавік Су-24. Мінабароны Расеі абвяргала гэтую інфармацыю.
Лукашэнка зьбірае тэрміновую нараду з вайскоўцамі
Яна пачнецца праз гадзіну, паведамляе BELTA.
Канцлер Нямеччыны Шольц выказаў «поўную салідарнасьць» з Украінай
Канцлер Нямеччыны Оляф Шольц у тэлефоннай размове запэўніў прэзыдэнта Ўкраіны Ўладзіміра Зяленскага ў «поўнай салідарнасьці Нямеччыны ў цяжкі час», — паведамляе DW са спасылкай на прэс-сакратара нямецкага ўраду Штэфэна Гэбэштрайта.
Людзі ў Кіеве хаваюцца ў мэтро
Самалёты аблятаюць Украіну і Беларусь
Украінцы зьвяртаюцца да беларусаў: «Не дазвольце Пуціну і Лукашэнку забіць вашых сыноў»
Тарас Беразавец у сваім тэлеграм-канале апублікаваў зварот да беларусаў. Ён спадзяецца, што беларускія вайскоўцы ня будуць падтрымліваць расейскіх і пакінуць войска проста цяпер.
МУС Украіны паведаміла пра тактыку расейскіх войскаў
Міністэрства ўнутраных спраў Украіны паведамляе, што Расея спачатку абстрэльвае ўкраінскую тэрыторыю з артылерыйскіх сыстэм, а потым адразу ўводзіць на яе вайсковую тэхніку.
Гэта адбылося, у прыватнасьці, у памежных пунктах пропуску «Сенькаўка» (на мяжы з Расеяй і Беларусьсю) і «Грамяч» (на мяжы з Расеяй), а таксама праз пункт «Бударкі» ў Харкаўскай вобласьці і «Мілава» ў Луганскай вобласьці (на мяжы з Расеяй).
«Расейская вайсковая тэхніка, у тым ліку браняваная, парушыла дзяржаўную мяжу ў Чарнігаўскай, Сумскай, Луганскай і Харкаўскай абласьцях», – адзначылі ў МУС Украіны.
Пазьней МУС паведаміла, што ў выніку абстрэлу з ракетных сыстэм у раёне пункту Прэабражэнка Херсонскай вобласьці адзін памежнік загінуў.
Пажар на вайсковым аэрадроме пад Харкавам
