У канфэрэнцыі бяруць удзел сусьветныя лідэры, у тым ліку генэральны сакратар ААН Антонію Гутэрыш, віцэ-прэзыдэнт ЗША Камала Гарыс, прэзыдэнт Украіны Ўладзімір Зяленскі, дзяржсакратар ЗША Энтані Блінкен і многія іншыя. Кіраўніцтва Расеі на канфэрэнцыі ня будзе.
Сёньня Сьвятлана Ціханоўская ўжо сустрэлася з камісарам унутраных спраў ЭЗ Ільвай Югансан. Яна выказала падзяку Эўразьвязу за тое, што яго краіны прынялі тысячы беларусаў, якія ратуюцца ад рэпрэсій. Многія маюць патрэбу ў абароне, некаторыя сутыкнуліся з сачэньнем КДБ нават на тэрыторыі Эўразьвязу, адзначыла Ціханоўская. Яна абмеркавала зь Югансан пытаньне аб несупрацоўніцтве з рэжымам Беларусі па лініі Інтэрполу і аб іншых падобных пагадненьнях, паведамляе прэс-служба Ціханоўскай.
Пасьля Сьвятлана Ціханоўская сустрэлася з мэрам Кіева Віталём Клічком. Падчас сустрэчы яна выказала салідарнасьць Украіне. Ціханоўская і Клічко абмеркавалі дапамогу беларусам у Кіеве, падтрымку беларускім СМІ і праваабаронцам, якія працуюць з украінскай сталіцы.
Пасьля сустрэчы з Клічко Ціханоўская сказала:
«Я прадстаўляю тут беларускі народ, які больш за 1,5 года змагаецца за свабоду, за сумленныя выбары, за вызваленьне палітвязьняў і за тое, каб даць людзям права выбіраць сваю будучыню. І, канечне, цяпер з прычыны слабасьці рэжыму яны гатовыя аддаць нашу радзіму ў арэнду трэцім краінам, каб пагражаць Украіне. Беларусы не жадаюць уцягвацца ні ў якія ваенныя канфлікты, асабліва супраць нашых суседзяў».
Мэр Кіева Віталь Клічко заявіў, што «можа пацьвердзіць словы Сьвятланы — гэта не супрацьстаяньне народаў, а супрацьстаяньне бачаньня сьвету і людзей, якія трымаюцца за свае крэслы і якіх па якіх-небудзь прычынах спрабуюць разьвязаць».
«Мы вельмі спадзяёмся, што мяжа Ўкраіны ня будзе парушаная, інтэрвэнцыя ня будзе разьвязаная, і гэта пытаньне выключна тых палітычных лідэраў, якія атаясамліваюць сябе з тымі працэсамі, што адбываюцца, і спрабуюць вырашаць свае пытаньні праз інтэрвэнцыю», — заявіў Віталь Клічко.
У кулюарах Мюнхэнскай канфэрэнцыі Сьвятлана Ціханоўская сустрэлася таксама з кіраўніцай Міжнароднага валютнага фонду Крысталінай Георгіевай і абмеркавала зь ёй пытаньне выдзяленьня мільярда даляраў Беларусі «для барацьбы з каранавірусам».
Ціханоўская адзначыла, што гэтыя грошы, хутчэй за ўсё, пойдуць на рэпрэсіі, а не на дапамогу людзям, і заклікала знайсьці спосаб заблякаваць гэтыя сродкі. Яна падкрэсьліла, што неабходна пераканацца, што ў будучым рэжым у Беларусі ня зможа злоўжываць мэханізмамі міжнароднай дапамогі. Ціханоўская атрымала запэўніваньні, што МВФ не зьбіраецца больш выдзяляць грошы рэжыму.
Сьвятлана Ціханоўская адзначыла, што Беларусь разьлічвае на дапамогу МВФ — як фінансавую, так і экспэртную адносна рэформаў — у новай Беларусі, пасьля перамен. Бакі дамовіліся падтрымліваць сувязь.
Таксама Сьвятлана Ціханоўская правяла сустрэчу з Вольфгангам Шмідтам, які зьяўляецца правай рукой Олафа Шольца і прадстаўляе на канфэрэнцыі ў Мюнхэне канцлера Нямеччыны. Ціханоўская расказала яму пра сытуацыю з палітвязьнямі, адзначыла пра цяжкую эканамічную і палітычную сытуацыю ў Беларусі, пагрозы незалежнасьці краіны.
Ціханоўская і Шмідт абмеркавалі неабходнасьць ціску на рэжым (у прыватнасьці — празь ліквідацыю шчылін у санкцыях) і працягу падтрымкі грамадзянскай супольнасьці, а таксама праграмы і спосабы падтрымкі палітвязьняў. Паколькі Нямеччына старшынюе ў G7, абмеркавалі таксама магчымасьць узьняць беларускае пытаньне на адной з наступных сустрэч G7.
У кулюарах Мюнхэнскай канфэрэнцыі па бясьпецы Сьвятлана Ціханоўская сустрэлася з заснавальнікам кампутарнай кампаніі Microsoft, амэрыканскім прадпрымальнікам Білам Гейтсам. Паведамляецца, што Гейтс прывітаў усіх беларусаў у яе асобе.
Як паведамілі на пачатку дня ў прэсавай службе Ціханоўскай, 18 лютага ў яе заплянаваныя іншыя двухбаковыя сустрэчы зь лідэрамі шэрагу дзяржаў, прадстаўнікамі вядучых тэхналягічных кампаній. Таксама Ціханоўская выступіць на круглым стале, арганізаваным Angermayer Policy & Innovation Forum, прысьвечаным сытуацыі зь беларускім бізнэсам і неабходнасьці прыцягваць інвэстыцыі ў новую Беларусь ужо цяпер.
Мюнхэнская канфэрэнцыя па бясьпецы праводзіцца штогод з 1962 году. На працягу першых 30 гадоў існаваньня форуму ў ім бралі ўдзел лідэры краін NATO; з 90-х гадоў мінулага стагодзьдзя ў ліку ўдзельнікаў зьявіліся Расея, краіны Ўсходняй Эўропы, Кітай, Індыя, Японія.
У 2022 годзе Мюнхэнская канфэрэнцыя па бясьпецы ўпершыню за два гады пройдзе ў вочным фармаце, з 18 па 20 лютага. За тыдзень да пачатку сёлетняй Мюнхэнскай канфэрэнцыі Масква — упершыню за 20 гадоў — цалкам адмовілася ад удзелу ў ёй.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.