ЗША прапануюць Расеі правесьці новую сэрыю вочных перамоваў, у тым ліку ў фармаце NATO і АБСЭ. Аб гэтым заявіў дзяржсакратар ЗША Энтані Блінкен, якога цытуе «Голас Амэрыкі».
Амэрыканскі бок учора заявіў аб тым, што ня бачыць прыкмет вайсковай дээскаляцыі з боку Расеі. Энтані Блінкен адзначыў, што колькасьць расейскіх войскаў ля мяжы з Украінай павялічылася на 7 тысяч чалавек, зьвярнуў увагу на рост колькасьці правакацыйных паведамленьняў у расейскіх СМІ, якія могуць сьведчыць,што рыхтуецца нагода для ўварваныя.
«Раней сёньня я накіраваў міністру замежных спраў Расеі Сяргею Лаўрову ліст з прапановай сустрэцца на наступным тыдні ў Эўропе пасьля нашых перамоваў, якія адбыліся ў апошнія тыдні, каб абмеркаваць крокі, якія мы можам зрабіць для бесканфліктнага ўрэгуляваньня гэтага крызісу. Мы таксама прапануем сустрэчы Рады Расея-NATO і Пастаяннай рады АБСЭ», — сказаў Блінкен.
Паводле яго, ЗША і саюзьнікі даюць Расеі ўсе магчымасьці для дэманстрацыі прыхільнасьці дыпляматычнаму шляху.
«Сёньня расейскі ўрад можа абвясьціць, безь якіх-небудзь агаворак, што Расея ня будзе ўрывацца ва Ўкраіну. Выразна сфармулюйце. Заявіце пра гэта сьвету прама. А затым прадэманструйце гэта, адправіўшы свае войскі, свае танкі, свае самалёты назад у казармы і ангары і адправіўшы сваіх дыпляматаў за стол перамоваў», — дадаў Блінкен.
«Стаўкі выходзяць далёка за межы Ўкраіны. Гэта момант пагрозы жыцьцю і бясьпецы мільёнаў людзей, а таксама асновам Статуту Арганізацыі Аб’яднаных Нацый, які базуецца на выкананьні прававых нормаў міжнароднага парадку, які захоўвае стабільнасьць ва ўсім сьвеце. Гэты крызіс непасрэдна закранае кожнага чальца гэтай рады і кожную краіну сьвету. Таму што асноўныя прынцыпы, якія падтрымліваюць мір і бясьпеку, прынцыпы, якія былі замацаваны пасьля дзьвюх сусьветных войнаў і „халоднай“ вайны, знаходзяцца пад пагрозай.
Прынцып, у адпаведнасьці зь якім адна краіна ня можа сілай зьмяніць межы іншай. Прынцып, у адпаведнасьці зь якім адна краіна ня можа дыктаваць іншай (краіне) выбар ці палітыку, ці тое, з кім яна ўступае ў саюз. Прынцып дзяржаўнага сувэрэнітэту».
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
