Пра гэта паведаміў тэлеграм-канал праваабаронцаў @MAYDAYMog.
17 лютага ў судзе Магілёўскай вобласьці пачаўся разгляд справы аб ліквідацыі грамадзкага аб’яднаньня «Магілёўскі праваабарончы цэнтар». Пазоўнікам выступіла ўпраўленьне юстыцыі Магілёўскага аблвыканкаму, якое прадстаўляла галоўная спэцыялістка аддзела дзяржаўнай рэгістрацыі юрыдычных асобаў Антаніна Маргунова. Ад самой арганізацыі ніхто на суд не прыйшоў. Судзьдзёй выступае Тацяна Карапецьян.
Сярод прычын для ліквідацыі арганізацыі тое, што колькасьць сяброў грамадзкага абʼяднаньня нібыта складае менш за 10 чалавек, што зьяўляецца парушэньнем закону. Як растлумачыла прадстаўніца аблвыканкаму, на 21 кастрычніка 2021 году ў складзе МПЦ налічвалася 11 чалавек.
Аднак чыноўнікам стала вядома, што сябры праваабарончага цэнтру Яўген Цюркін і Ўладзімер Таборка заявілі аб выхадзе з МПЦ, «пра што паведамілі ва ўпраўленьне юстыцыі і дырэктару МПЦ». У абодвух чальцоў МПЦ у студзені 2022 году адбыліся ператрусы.
Таксама пытаньні выклікалі пратаколы пасяджэньняў МПЦ.
Рашэньне аб ліквідацыі пакуль ня вынесьлі — наступнае паседжаньне адбудзецца 24 лютага.
Сёлета ў студзені ў прадстаўнікоў арганізацыі прайшлі ператрусы. 15 лютага затрымлівалі затрымлівалі дырэктара МПЦ Уладзімера Краўчанку за распаўсюд матэрыялаў тэлеканалу «Белсат», якія беларускія ўлады прызналі экстрэмісцкімі.
Магілёўскі праваабарончы цэнтар заставаўся адзінай рэгіянальнай арганізацыяй праваабаронцаў у Беларусі і апошняй незалежнай правабарончай арганізацыяй, зарэгістраванай уладамі. Аднак апошнія паўтара года МПЦ актыўна не функцыянаваў.
Летась у ліпені беларускія ўлады правялі ператрусы ў дзясятках грамадзкіх арганізацый па ўсёй Беларусі, затрымлівалі іх сяброў. За апошнія паўгода перажылі рэпрэсіі і ліквідацыю каля 300 недзяржаўных беларускіх арганізацый.
Ліквідацыя недзяржаўных арганізацый у Беларусі
У красавіку 2021 міністар замежных спраў Беларусі Ўладзімер Макей заявіў, што ў адказ на заходнія санкцыі ў Беларусі можа быць зьнішчана грамадзянская супольнасьць.
«Любое далейшае ўзмацненьне жорсткасьці санкцый прывядзе да таго, што грамадзянская супольнасьць, пра якую яны клапоцяцца, перастане існаваць. І гэта будзе, я лічу, абсалютна абгрунтавана ў дадзенай сытуацыі», — сказаў Макей.
22 ліпеня Аляксандар Лукашэнка заявіў пра зачыстку недзяржаўных арганізацый.
«Так і ўрад, і МЗС пабеглі за „дэмакратыяй“ і пастваралі ў нас (хай Макей ізноў ня прыме на свой рахунак, гэта і да яго яшчэ было, яму гэта ў спадчыну дасталася, трэба цяпер разграбаць), і мы атрымалі пад 2 тысячы на невялікую краіну НДА, НКА, бандытаў і замежных агентаў. Ну і што, дэмакратыю атрымалі?»
«Ідзе зачыстка. Вы думаеце, гэта проста? Там ужо тысячы людзей працуюць, нашых людзей, і ў асноўным з павернутымі, прамытымі за чужыя грошы мазгамі», — сказаў Лукашэнка.
30 ліпеня Лукашэнка заявіў, што «пад выглядам дабрачыннасьці некамэрцыйныя арганізацыі адпрацоўваюць чужую палітычную замову». Ён сказаў, што розных недзяржаўных фондаў, прыватных установаў, праваабарончых арганізацый у Беларусі было паўтары тысячы.
«У выніку праведзеных мерапрыемстваў выдзелена 185 дэструкцыйных структураў, якія нясуць патэнцыйную пагрозу нацыянальнай бясьпецы, у тым ліку прадстаўніцтва замежнай некамэрцыйнай арганізацыі, 71 рэспубліканскае і мясцовае грамадзкае аб’яднаньне, 113 установаў», — сказаў Лукашэнка на нарадзе з чыноўнікамі.
Зь сярэдзіны ліпеня адбываецца масавая ліквідацыя недзяржаўных арганізацыяў па ўсёй краіне. Пад пагрозай існаваньне дзясяткаў асьветніцкіх, праваабарончых, дабрачынных, спажывецкіх, дасьледчых і іншых арганізацыяў. Прадстаўнікоў установаў затрымліваюць, праводзяць у іх дома і ў офісах ператрусы, арыштоўваюць рахункі.
Па стане на канец 2021 году ўлады ліквідавалі як найменей 275 НДА, яшчэ шэраг — у працэсе ліквідацыі ці пад яе пагрозай.
Праз год пасьля пачатку масавага ціску, у ліпені 2022 году, стала вядома, што ўлады ліквідавалі або давялі да самаліквідацыі 857 недзяржаўных арганізацый. А маніторынг Lawtrend на канец 2022 году паказаў, што за два гады грамадзкі сэктар Беларусі пазбавіўся ня менш як 1102 некамэрцыйных арганізацый.
Адной з галоўных падзей стала ліквідацыя незалежных прафсаюзаў у краіне. Лідэрам арганізацый прысудзілі вялікія турэмныя тэрміны.
Сярод зьліквідаваных арганізацый
- • Human Constanta
- • Беларуская асацыяцыя журналістаў
- • Беларускі Хэльсынскі камітэт
- • Гродна Лайф Медыя
- • Згуртаваньне беларусаў сьвету «Бацькаўшчына»
- • Зьвяно
- • Имена
- • Мова нанова
- • Офіс па правах людзей з інваліднасьцю
- • ПЭН-цэнтар
- • Прававая ініцыятыва
- • Саюз беларускіх пісьменьнікаў
- • Тэрыторыя правоў
- • Цэнтар прававой трансфармацыі
- • Экадом
- Таварыства беларускай мовы
- Дзіцячыя госьпісы ў Горадні і Віцебску
- Беларускі прафсаюз работнікаў радыёэлектроннай прамысловасьці (РЭП)
- Свабодны прафсаюз Беларускі (СПБ)
- Беларускі незалежны прафсаюз (БНП)
- Беларускі кангрэс дэмакратычных прафсаюзаў (БКДП)
2024 год. У апублікаваным 7 траўня аглядзе праваабарончай арганізацыі Lawtrend гаворыцца, што за пэрыяд пасьля прэзыдэнцкіх выбараў 2020 году і да канца красавіка 2024-га ўлады Беларусі зьліквідавалі ня менш за 1622 некамэрцыйныя арганізацыі. У працэсе прымусовай ліквідацыі знаходзілася ня менш за 1003 НКА, рашэньне аб самастойнай ліквідацыі прынялі сама меней 619.
