Гэта можа стаць падставай для аднаўленьня Дамова аб ліквідацыі ракет сярэдняй і меншай далёкасьці, дзеяньне якога спынілася ў 2019 годзе. Пра гэта піша газэта The New York Times са спасылкай на крыніцы, знаёмыя з перададзенымі Маскве дакумэнтамі.
Вашынгтон і яго саюзьнікі таксама гатовыя абмеркаваць з Расеяй узаемныя абмежаваньні на правядзеньне вайсковых вучэньняў. У прыватнасьці, прапануецца праводзіць іх удалечыні ад межаў, каб манэўры не ўспрымаліся як падрыхтоўка да нападу на суседнюю краіну.
Дамова аб ракетах сярэдняй і меншай далёкасьці была падпісаная СССР і ЗША ў 1987 годзе. Дакумэнт забараняў краінам распрацоўваць і мець на ўзбраеньні і распрацоўваць балістычныя і крылатыя ракеты наземнага базаваньня. У 2018 годзе ЗША аб’явілі аб выхадзе з дамовы і ў 2019 годзе яна страціла сваю сілу. Вашынгтон тады абвінаваціў Маскву ў парушэньні ўмоў з прычыны распрацоўкі ракеты 9М729. Расея абвінавачваньні адпрэчыла, заявіўшы, што далёкасьць ракеты не перавышае 500 кілямэтраў.
З восені мінулага году ЗША заяўляюць аб канцэнтрацыі расейскіх вайскоўцаў каля межаў з Украінай. Краіны Захаду кажуць пра рэальную пагрозу расейскага ўварваньня ў суседнюю краіну. Масква адмаўляе пляны ўварваньня. Краіны Захаду заяўляюць, што, калі яно адбудзецца, накладуць на Расею «небывалыя» санкцыі.
Расея ў сьнежні летась на гэтым фоне вылучыла шэраг патрабаваньняў да ЗША і NATO — у прыватнасьці, адмовіцца ад пашырэньня NATO на ўсход і ад разьмяшчэньня ў Эўропе ракет сярэдняй і меншай далёкасьці і ядзернай зброі ЗША.
Перамовы ў студзені да посьпеху не прывялі. Бакі дамовіліся працягнуць абмеркаваньне.
26 студзеня ЗША перадалі Расеі пісьмовыя адказы на расейскія патрабаваньні. Дзярждэпартамэнт заявіў, што зьмест дакумэнту ня будзе апублікаваны, і сказаў, што чакае і ад Расеі захаваньня яго ў таямніцы. Дзяржсакратар ЗША Энтані Блінкен пры гэтым адзначыў, што ЗША і іх саюзьнікі не адступіліся ад асноватворных прынцыпаў NATO — такіх як адкрытасьць Паўночнаатлянтычнага саюзу для ўступленьня новых членаў.
Прэс-сакратар Крамля Дзьмітрый Пяскоў у пятніцу заявіў, што адказы ЗША і NATO перададзены прэзыдэнту Ўладзіміру Пуціну, і спатрэбіцца некаторы час на іх вывучэньне. «Было выказана меркаваньне нашых візаві, што гэтыя паперы ў адказ ня варта публікаваць, але зь іншага боку нашы калегі так падрабязна выклалі зьмест, што сапраўды можа і ня варта, і так усё вядома» — сказаў Пяскоў, дадаўшы, што, мяркуючы па публічных заявах прадстаўнікоў ЗША і NATO, «нельга сказаць, што нашы меркаваньні былі ўлічаныя».
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
