Пра гэта першапачаткова паведамілі СМІ, а пасьля інфармацыю пацьвердзіла і расейскае зьнешнепалітычнае ведамства. У паведамленьні на яго сайце гаворыцца, што Джона Салівана па яго просьбе прыняў намесьнік міністра Аляксандар Грушко.
«Падчас сустрэчы кіраўнік амэрыканскай дыпмісіі перадаў пісьмовы адказ адміністрацыі ЗША на раней прадстаўлены расейскім бокам праект двухбаковай дамовы аб гарантыях бясьпекі», — гаворыцца на сайце.
Па зьвестках расейскіх агенцтваў, Саліван правёў у МЗС Расеі каля паўгадзіны.
Як заявіў дзяржаўны сакратар ЗША Энтані Блінкен, якога цытуе CNN, амэрыканскі адказ прапануе «сур’ёзны дыпляматычны шлях наперад, калі Расея яго абярэ». Акрамя таго, у дакумэнце выкладаюцца засьцярогі, выказаныя ЗША і іх саюзьнікамі. Паводле Блінкена, у наступныя дні ён чакае далейшых перамоваў зь міністрам замежных спраў Расеі Сяргеем Лаўровым.
Блінкен адмовіўся агучыць дэталі прапанаванага дакумэнту, але сказаў, што ЗША, сярод іншага, паўтарылі тое, што раней заяўлялі публічна — NATO захавае палітыку «адчыненых дзьвярэй» і ня прыме патрабаваньняў Расеі абавязацца ніколі не прымаць у альянс Украіну.
Дзяржсакратар ЗША падкрэсьліў, што цяпер ініцыятыва застаецца за Расеяй, якой трэба выбраць, якім шляхам пайсьці, а Злучаныя Штаты гатовыя да любога варыянту. Блінкен дадаў, што NATO перадасьць Расеі свой асобны адказ.
Ён таксама заявіў, што амэрыканскім грамадзянам, якія знаходзяцца ва Ўкраіне, варта сур'ёзна задумацца наконт адʼезьду з краіны.
У праекце двухбаковай дамовы, перададзенай Расеяй ЗША ў сярэдзіне сьнежня, амэрыканскаму боку, сярод іншага, прапануецца: узяць на сябе абавязаньне аб недапушчэньні пашырэньня NATO на ўсход, спыніць вайсковае супрацоўніцтва з постсавецкімі краінамі, прыбраць з тэрыторыі Эўропы сваю ядзерную зброю і не разьмяшчаць там ударных сыстэм, здольных пагражаць Расеі. Усяго ў праекце дамовы восем артыкулаў.
Расейскі праект дамовы быў апублікаваны на сайце МЗС РФ неўзабаве пасьля перадачы яго амэрыканцам. Кіраўнік МЗС РФ Сяргей Лаўроў заявіў, што гатовы апублікаваць і амэрыканскую рэакцыю, аднак у Дзярждэпартамэнце ЗША папрасілі гэтага не рабіць. Па словах Сяргея Лаўрова, пасьля атрыманьня адказу амэрыканскага боку МЗС Расеі і іншыя кампэтэнтныя ведамствы прадставяць прэзыдэнту Ўладзіміру Пуціну прапановы наконт далейшых крокаў у сфэры бясьпекі.
Візыт Салівана ў МЗС Расеі адбыўся на фоне абвастрэньня напружанасьці паміж Расеяй і Ўкраінай і занепакоенасьці ЗША і іх саюзьнікаў наконт магчымых ваенных дзеяньняў з боку Масквы.
Паводле інфармацыі заходняй выведкі, Расея за апошнія месяцы сканцэнтравала каля межаў Украіны да ста тысяч сваіх вайскоўцаў — як мяркуецца, рыхтуючы ўварваньне на тэрыторыю гэтай дзяржавы.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
