Паводле паведамленьня ўкраінскай выведкі, у распараджэньне сэпаратыстаў, якія падтрымліваюцца Расеяй, з пачатку студзеня паступіла больш за 7 тысяч тон паліва, танкі і самаходныя артылерыйскія ўстаноўкі, іншае ўзбраеньне і боепрыпасы.
Таксама, як гаворыцца ў паведамленьні, у цэнтрах вэрбаваньня на тэрыторыі Расеі ідзе «актыўны набор наймітаў», якія пасьля праходжаньня інтэнсіўнай падрыхтоўкі накіроўваюцца ў Данецкую і Луганскую вобласьці.
Паведамленьні паступаюць на фоне разгортваньня каля межаў з Украінай буйной групоўкі расейскіх войскаў. ЗША і іх саюзьнікі лічаць, што Расея неўзабаве можа пачаць шырокамаштабнае ўварваньне на тэрыторыю Ўкраіны — хоць аб’ёмы і мэты меркаванага ўварваньня пакуль не зусім ясныя.
Вядучыя прадстаўнікі ЗША, у тым ліку дзяржсакратар і прэзыдэнт, заяўляюць, што нават калі адзін расейскі вайсковец перасячэ мяжу Ўкраіны, гэта будзе лічыцца ўварваньнем і пацягне за сабой рэакцыю Захаду (незразумела, зрэшты, ці адносіцца гэта заява да анэксаванага Крыму, дзе расейскія войскі разьмешчаныя адкрыта, і да кантраляваных сэпаратыстамі тэрыторый Данбасу, дзе, як сьцьвярджае Масква, расейскіх войскаў няма). Пры гэтым ЗША указваюць на тое, што Расея можа, як і раней, выкарыстоўваць «гібрыдную» тактыку, без адкрытага ўдзелу сваіх вайскоўцаў. Яснасьці аб тым, якія меры прыме Захад у адказ на такую тактыку, пакуль няма.
Сэпаратысты так званай «ДНР» сьцьвярджаюць, што Ўкраіна перакінула ў Данбас восем рэактыўных сыстэм «Сьмерч» і «Ураган», і лічаць гэта падрыхтоўкай да «разьвязваньня актыўных баявых дзеяньняў» у рэгіёне. Кіеў неаднаразова заяўляў, што не рыхтуе наступу ў Данбасе.
- У апошнія дні ўвагу прыцягвае перакідваньне расейскіх вайскоўцаў і тэхнікі з Далёкага Ўсходу на Захад. Як адзначаецца ў расьсьледаваньні Радыё Свабода і CIT, частка вайскоўцаў едзе на вучэньні ў Беларусь, якія пройдуць у лютым, аднак іншая частка адпраўляецца да мяжы з Украінай у працяглыя камандзіроўкі.
- У пятніцу «Інтэрфакс» са спасылкай на Мінабароны Расе піша, што два дывізіёны сыстэм супрацьпаветранай абароны (СПА) далёкага дзеяньня С-400 «Трыюмф» накіраваныя па чыгунцы з Далёкага Ўсходу ў Беларусь. Пасьля прыбыцьця «да месцаў выкананьня навучальных задач» на «незнаёмыя палігоны» Беларусі расейскія вайскоўцы правядуць маскіроўку пускавых пазыцый, тэхнічнае абслугоўваньне абсталяваньня і заступяць на вучэбнае баявое дзяжурства па СПА, паведамілі ў вайсковым ведамстве Расеі.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
