Пра гэта піша DW.
Дзярждэпартамэнт ЗША апублікаваў пералік выказваньняў расейскага боку аб канфлікце вакол Украіны, якія Вашынгтон расцэньвае як дэзынфармацыю. Тым самым Расея імкнецца пераканаць уласных грамадзян у неабходнасьці ваеннай апэрацыі РФ на ўкраінскай тэрыторыі, а краіны Захаду — у тым, што паводзіны Кіева пагражаюць справакаваць глябальны канфлікт, зазначаюць у Вашынгтоне.
Дзярждэпартамэнт: «Рэжым Пуціна ўскладае віну на ахвяру» ў абліччы Кіева
У прыватнасьці, у ЗША ня згодныя з тым, што Ўкраіна і яе ўрад нібыта зьяўляюцца агрэсарам у адносінах з РФ. Менавіта Расея ў 2014 годзе ўварвалася ва Ўкраіну і анэксавала Крым, падкрэсьлілі ў Вашынгтоне. «Ілжывыя заявы рэжыму Пуціна ўскладаюць віну за расейскую агрэсію на ахвяру, Украіну», — адзначаецца ў заяве.
Вашынгтон адпрэчыў сьцьвярджэньне аб тым, што менавіта краіны Захаду падштурхоўваюць Украіну да канфлікту. Цяперашні крызіс справакавала Масква, разьмясьціўшы больш за 100 тысяч вайскоўцаў на мяжы з Украінай, ніякіх падобных вайсковых дзеяньняў на ўкраінскім баку мяжы не праводзілася, падкрэсьліваюць у амэрыканскім замежнапалітычным ведамстве.
«Расея абвінавачвае ва ўласнай агрэсіі іншых, але менавіта Масква павінна пакласьці канец гэтаму крызісу мірным шляхам з дапамогай дээскаляцыі і дыпляматыі», — адзначаецца ў дакумэнце.
Перакідваньне расейскіх сіл на мяжу з Украінай
Дзярждэпартамэнт ня лічыць сьцягваньне расейскіх вайскоўцаў да мяжы з Украінай усяго толькі перамяшчэньнем сіл на ўласнай тэрыторыі РФ, як неаднаразова запэўнівалі расейскія чыноўнікі.
«Разьмяшчэньне больш за 100 тысяч вайскоўцаў і наступальнага ўзбраеньня каля межаў краіны, у якую Расея ўжо ўрывалася і да гэтага часу акупуе яе часткі, ня проста ратацыя войскаў», — упэўнены ў Вашынгтоне.
Масква да гэтага часу ня дала праўдападобнага тлумачэньня таго, што адбываецца, адзначылі ў амэрыканскім замежнапалітычным ведамстве.
ЗША: Расея ня раз ужывала хімічную зброю для замаху на апанэнтаў
Яшчэ адным прыкладам дэзынфармацыі ў ЗША лічаць словы міністра абароны РФ Сяргея Шайгу пра нібыта плянаваную ЗША хімічную атаку ў Данбасе. Злучаныя Штаты, як і Расея, ратыфікавалі Канвэнцыю аб забароне хімічнай зброі, указаў Вашынгтон. Расея ў апошнія гады двойчы прымяняла хімічную зброю для замаху на апанэнтаў, у тым ліку за межамі сваёй тэрыторыі, адзначылі ў Дзярждэпартамэнце.
Акрамя таго, Вашынгтон адносіць да дэзынфармацыі выказваньне кіраўніка Крамля, у якім Пуцін параўнаў тое, што адбываецца ў Данбасе, з генацыдам. У амэрыканскім замежнапалітычным ведамстве асабліва вылучылі адсутнасьць дакладных зьвестак аб пагрозе для этнічных расейцаў або расейскамоўных асоб, якая зыходзіць ад украінскага ўраду.
Дзярждэпартамэнт: NATO не давала абяцаньняў не пашырацца
Адпрэчылі ў Вашынгтоне і сьцьвярджэньні прэзыдэнта РФ аб парушэньні блёкам NATO абяцаньня не пашырацца. Альянс зьяўляецца абарончым саюзам, нацэленым на абарону сваіх дзяржаў-удзельніц і не даваў абяцаньняў не прымаць новых краінаў у свой склад, указалі ў Дзярждэпартамэнце. А ў адказ на заявы расейскага боку аб нібы атачэньні Расеі сіламі NATO ЗША нагадалі, што працягласьць расейскіх сухапутных межаў з 14 краінамі складае больш за 20 тысяч кілямэтраў, а на долю пяці краін – сяброў NATO прыпадае толькі 1 215 км агульнай мяжы.
Камэнтуючы сьцьвярджэньні расейскага боку аб адмове ад дыпляматыі і неадкладным пераходзе да санкцый, у Вашынгтоне падкрэсьлілі, што Злучаныя Штаты і іх партнэры ўцягнутыя ў інтэнсіўныя дыпляматычныя намаганьні ў мірным вырашэньні крызісу. Кансультацыі праходзяць у тым ліку на ўзроўні прамых кантактаў з расейскім урадам, зазначыў амэрыканскі бок.
Афіцыйная прадстаўніца МЗС РФ Марыя Захарава ў сваім Telegram-канале абурылася публікацыяй Дзярждэпартамэнту, назваўшы яе «хлусьнёй» і «непісьменнасьцю», а само ведамства — «міністэрствам праўды».
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
