Паводле чыноўніцы, якую цытуе Беларуская тэлевізія, у так званым «сьпісе Васкрасенскага» не было выразных крытэраў, якія маглі б служыць падставай для вызваленьня ўсіх уключаных туды асобаў.
Прыкладна чвэрць зь ліку «кандыдатаў» ня мела прысудаў або рашэньне не набыло законную моц. Такія выпадкі камісіяй не разглядаюцца.
17 чалавек — злосныя парушальнікі рэжыму адбыцьця пакараньня. Адпаведна, гэта сьведчыць, што яны ня сталі на шлях выпраўленьня.
Больш за дзесяць асобаў зрабілі злачынствы, зьвязаныя з карупцыяй, незаконным абарачэньнем наркотыкаў ці зброі.
Парадку 6 чалавек раней судзімыя альбо ўчынілі правапарушэньні падчас адбыцьця пакараньня.
Акрамя таго, некаторыя катэгарычна адмовіліся пісаць прашэньне аб памілаваньні. Адпаведна, камісія разглядала больш вузкае кола, сказала Вольга Чупрыс, падсумаваўшы, што ў выніку Лукашэнка памілаваў 13 чалавек. Іх прозьвішчы не называюцца.
9 жніўня падчас «Вялікай размовы» прадстаўнік «Круглага стала дэмакратычных сілаў» Юры Васкрасенскі агучыў прапанову аб вызваленьні першай сотні чалавек, зьняволеных паводле палітычных артыкулаў.
Лукашэнка паабяцаў паглядзець сьпіс, але выставіў сваю ўмову — Васкрасенскі «пэрсанальна адказвае ўласнай галавой за кожнага».
Тады Васкрасенскі ўдакладніў, што ў прашэньні аб памілаваньні гаворка пра 93 «аблудных», яшчэ 6 чалавек — банкіры, якія кампэнсавалі шкоду і актыўна супрацоўнічалі са сьледзтвам, і адзін — экс-кіраўнік Магілёўскай філярмоніі.
