Памежнікі ўбачылі нелегальных мігрантаў зь верталёту — іх атачалі багністыя нізіны рачной поймы, паведаміла 20 жніўня польская Памежная служба.
Празь цяжкую даступнасьць месца верталёт ня мог прызямліцца побач зь людзьмі, якія цярпелі бедзтва. Пасьля зьніжэньня адзін з супрацоўнікаў памежнай аховы саскочыў, каб аказаць першую дапамогу пацярпелым і каардынаваць далейшыя дзеяньні.
На выспе знаходзілася 12 чалавек, у тым ліку аднагадовае дзіця і двое падлеткаў. Два чалавекі мелі патрэбу ў дапамозе лекара, аднаго зь іх давялося несьці на насілках.
Мігрантаў эвакуявалі на лодках. Выратаваныя мігранты апынуліся грамадзянамі Ірака і адзін — Эгіпта, яны перайшлі мяжу з тэрыторыі Беларусі. Двое шпіталізаваныя, астатнія — дастаўленыя ва ўстанову памежнай аховы ў Нараўцы.
