Жонка палітычнага вязьня Аляксандра Фядуты Марына Шыбко расказала апошнія навіны ад мужа. Вядомы паліттэхноляг і філёляг ужо 4 месяцы знаходзіцца ў турме, так званай «амэрыканцы» ў цэнтры Менску, па абвінавачаньні ў «змове» супраць дзяржаўнага ладу.
Утрыманьне Фядуты пад вартай падоўжылі да 12 кастрычніка, але ён з турмы піша, што зьбіраецца сустрэць там і дзень нараджэньня, і Новы год.
Жонка перадала Фядуту ў камэру тэлевізар.
«Сьледчыя дзеяньні тры месяцы не праводзіліся, напэўна, не прыдумалі далейшы сцэнар „кіна“. Памяняліся сукамэрнікі, пра што журыўся, дзецюкі былі прыстойныя і „рукастыя“, што нават штаны яму ўшылі, якія „выходныя“, бо схуднеў. Сьпякоту перанёс ніштавата, вырвалі зуб вельмі ўдала, але аднавілася падагра, кульгае, а кіёчак нельга ўзяць».
Марына Шыбко адзначае, што Аляксандар вельмі рады, што аднавіліся закупкі кніг, ён набыў «Московскую сагу» Аксёнава, «Сандро из Чегема» Іскандэра, тры часткі «Чонкина» і «Путешествие дилетантов» Акуджавы.
Таксама жонка адзначае, што Фядута «падсадзіў» сукамэрнікаў на прозу Сяргея Даўлатава, абмеркаваньне якой перарасло ў сапраўдную чытацкую канфэрэнцыю.
«Піша, што не ўкладаецца ў галаве закрыцьцё НДА. Перадае прывітаньні ўсім сябрам, якія памятаюць і пішуць, нават калі не даходзяць лісты».
Затрыманьне Зянковіча, Кастусёва, Фядуты і справа «змоўшчыкаў». Што трэба ведаць
- У Шклове ўвечары 12 красавіка затрымалі кіраўніка Партыі БНФ Рыгора Кастусёва. Тады было вядома толькі, што ён праходзіць у крымінальнай справе і знаходзіцца ў СІЗА КДБ.
- Увечары таго ж дня жонка беларускага паліттэхноляга Аляксандра Фядуты паведаміла пра яго зьнікненьне ў Маскве. 13 красавіка КДБ Беларусі паведаміў, што Фядуту затрымалі.
- У ноч на 14 красавіка стала вядома аб затрыманьні ў Маскве беларускага адваката з ЗША Юрася Зянковіча. Усе яны цяпер у менскім СІЗА КДБ.
- Увечары 17 красавіка дзяржаўныя СМІ Беларусі паказалі заяву Аляксандра Лукашэнкі, што заходнія спэцслужбы рыхтавалі збройны мяцеж, а таксама замах на яго і на ягоных дзяцей.
- Лукашэнка абвінаваціў у датычнасьці да падрыхтоўкі замаху затрыманых Зянковіча, Кастусёва і Фядуту.
- Амаль сынхронна ФСБ Расеі заявіла, што яны сумесна з КДБ Беларусі спынілі меркаваную змову з удзелам Зянковіча і Фядуты, якія нібыта плянавалі 9 траўня «ажыцьцяўленьне вайсковага перавароту ў Беларусі па адпрацаваным сцэнары „каляровых рэвалюцый“ з прыцягненьнем мясцовых і ўкраінскіх нацыяналістаў, а таксама фізычную ліквідацыю Аляксандра Лукашэнкі».
- У рэпартажы на беларускім дзяржаўным тэлеканале АНТ паказалі фрагмэнт відэаразмовы ў Zoom, у якой, акрамя Зянковіча, Кастусёва і Фядуты, удзельнічалі яшчэ чатыры чалавекі (усе жывуць у ЗША), нібыта ўдзельнікі змовы. У інтэрвію Свабодзе двое зь іх адкінулі абвінавачаньні (тут і тут).
- Афіцыйныя прадстаўнікі ЗША і Польшчы назвалі абвінавачаньні ўладаў Беларусі і Расеі на свой бок няпраўдай.
- 21 красавіка Ўладзімір Пуцін заявіў, што краіны Захаду ігнаруюць факты падрыхтоўкі «дзяржаўнага перавароту ў Беларусі» і «плянаваньня забойства» Аляксандра Лукашэнкі. Ён абвінаваціў удзельнікаў «змовы супраць Лукашэнкі» ў падрыхтоўцы масаванай кібэратакі на Беларусь.
- 22 красавіка стала вядома, што старшыня Партыі БНФ Рыгор Кастусёў, палітоляг Аляксандар Фядута і юрыст Юры Зянковіч абвінавачаныя ў змове з мэтай захопу дзяржаўнай улады неканстытуцыйным шляхам (ч. 1 арт. 357 Крымінальнага кодэксу).
- 30 красавіка КДБ назваў імёны дзевяці абвінавачаных. Гэта Аляксандар Фядута, Юры Зянковіч, Рыгор Кастусёў, Вольга Галубовіч, Дзьмітры Шчыгельскі, Аляксандар Перапечка, Павал Кулажанка, Віталь Макаранка, Ігар Макар. Акрамя Фядуты, Зянковіча і Кастусёва, у няволі трымаюць Вольгу Галубовіч.
- Прысуды ў справе: Юрасю Зянковічу — 11 гадоў калёніі, Аляксандру Фядуту — 10 гадоў, Рыгору Кастусёву — 10 гадоў, Дзянісу Краўчуку — 2,5 года.
