“Гэта пытаньне часу і цаны, якую мы заплацім. А пакуль мы не чальцы вялікага альянсу, то мусім атачыць сябе альянсамі з дружалюбнымі дзяржавамі”, - заявіў Дзьмітро Кулеба, выступаючы на ўсеўкраінскім форуме “Украіна 30. Міжнародная палітыка”.
Украінскі міністар удакладніў, што за апошнія паўтара года Ўкраіна інтэнсыфікавала дачыненьні з Турэччынай, стварыла асацыяванае трыё з Малдовай і Грузіяй у межах супрацы з Эўразьвязам, а таксама Люблінскі трыкутнік з Польшчай і Літвой.
“Трыкутнік мае нашмат большы кантэкст. Гэта важны элемэнт узмацненьня актыўнай ролі Ўкраіны ў Цэнтральнай Эўропе. Тут, у Цэнтральнай Эўропе, мы свае. І няма ніякага адзінага народу расейцаў, украінцаў і беларусаў. Калі і ёсьць міт пра тры братнія народы ў нашай частцы Эўропы, то гэта хутчэй міт пра Леха, Чэха і Руса, які выцерлі з гісторыі”, - падкрэсьліў міністар замежных справаў Украіны.
Паводле міталёгіі, браты-славяне Чэх, Лех і Рус заснавалі Чэхію, Польшчу і Русь. Яны палявалі разам, але кожны вырашыў пайсьці сваім кірункам: Рус на ўсход, Чэх на захад, а Лех - на поўнач.
Прэзыдэнт Расеі Ўладзімір Пуцін 30 чэрвеня чарговы раз заявіў, што расейцы і ўкраінцы — адзін народ. Гэты тэзіс ён вельмі часта паўтараў да 2014 году, калі пачалася агрэсія Расеі ва Ўкраіну.
Прэзыдэнт Украіны Ўладзімір Зяленскі не пагадзіўся з Пуціным. Ён заявіў:
«Мы дакладна не адзін народ. Так, у нас ёсьць шмат агульнага. У нас агульная частка гісторыі, памяць, суседзтва, сваякі, агульная перамога над фашызмам і агульныя трагедыі... Мы дакладна не адзін народ. У кожнага з нас свой шлях. ...І яшчэ — немагчыма адначасова гаварыць пра „адзін народ“ і адкрыта захопліваць нашыя тэрыторыі і працягваць бойню на Данбасе. Гэта ж відавочна».
