Кубілюс заяўляе, што Беларусь, а не Лукашэнка, зьяўляецца партнэрам ЭЗ ва «Ўсходнім партнэрстве». На думку эўрадэпутата, рашэньні, якія прымае Аляксандар Лукашэнка, нелігітымныя:
«Незаконны Лукашэнка сфальсыфікаваў выбары і стаў узурпатарам улады ў Беларусі, — піша Кубілюс. — Рэжым Лукашэнкі пастаянна і адчайна спрабуе ўтрымаць уладу, ужываючы рэпрэсіі супраць нявінных беларусаў і ўчыняючы тэрарыстычныя акты, распальваючы страх, выкарыстоўваючы масавую прапаганду і пагрозы. Рашэньні Лукашэнкі з пункту гледжаньня міжнароднага права несапраўдныя».
На думку сустаршыні Парлямэнцкай асамблеі Euronest, «нядаўнюю заяву рэжыму Лукашэнкі пра так званае прыпыненьне ўдзелу Беларусі ва „Ўсходнім партнэрстве“ азначае адзінае: дыктатар Лукашэнка можа сысьці з ініцыятывы „Ўсходняга партнэрства“, аднак ні ён, ні яго нелегітымны рэжым ня ў стане ліквідаваць Беларусь з палітыкі і праграм „Усходняга партнэрства“ ЭЗ».
Андрус Кубілюс заяўляе, што «рашэньні нелегітымнага рэжыму ня маюць прававых наступстваў. Для ЭЗ, яго дзяржаў-членаў і інстытутаў Беларусь застаецца партнэрам у ініцыятыве „Ўсходняга партнэрства“. І гэтаксама любыя далейшыя рашэньні Лукашэнкі або яго рэжыму ў дачыненьні да Беларусі будуць несапраўднымі. Рашэньні аб будучыні Беларусі знаходзяцца ў руках народу Беларусі. Толькі народ Беларусі пры дапамозе свабодных і дэмакратычных выбараў можа выбраць шлях сваёй краіны.
Мы чакаем, што дыктатар Лукашэнка неўзабаве прыме апошняе слушнае рашэньне пакінуць Беларусь. Міжнародная супольнасьць і Эўразьвяз у прыватнасьці падтрымліваюць народ Беларусі і гатовыя дапамагчы яму ў мірнай перадачы ўлады з дапамогай дэмакратычных і свабодных выбараў».
У сваёй заяве Андрус Кубілюс піша, што Эўрапарлямэнт таксама лічыць, што Беларусь застаецца ўдзельніцай ініцыятывы «Ўсходняе партнэрства», і гатовы пашыраць узаемадзеяньне з дэмакратычнымі сіламі Беларусі.
Таму, на думку Кубілюса, варта афіцыйна запрасіць лідэраў дэмакратычнай Беларусі прадстаўляць Беларусь на маючым адбыцца саміце «Ўсходняга партнэрства», які адбудзецца ў Брусэлі ў сьнежні 2021 году.
«Нелегітымныя заявы узурпатара Лукашэнкі ніяк не паўплываюць на статус краіны. Беларусь застаецца ў ініцыятыве «Ўсходняе партнэрства» — падсумоўвае сустаршыня Парлямэнцкай асамблеі Euronest, дэпутат Эўрапарлямэнту Андрус Кубілюс.
