16 чэрвеня ў Менску праходзіць шостае пасяджэньне Канстытуцыйнай камісіі, на якім разглядаюцца канстытуцыйныя палажэньні аб судовай сыстэме.
Якія прапановы прагучалі:
- Канстытуцыйны суд Беларусі плянуюць надзяліць правам праверкі вынікаў парлямэнцкіх і прэзыдэнцкіх выбараў і працэсу імпічмэнту прэзыдэнта, паведамляе «Інтэрфакс». Пра такія паўнамоцтвы, якія хочуць надаць Канстытуцыйнаму суду, заявіла ўдзельніца Канстытуцыйнай камісіі, намесьніца старшыні Канстытуцыйнага суду Беларусі Натальля Карповіч.
- У абмеркаваньні імпічмэнту гаворка ідзе пра заключэньне КС аб «захаваньні вызначанага парадку выстаўленьня абвінавачаньня ў выпадку пастаноўкі пытаньня аб зьняцьці прэзыдэнта з пасады ў сувязі з учыненьнем дзяржаўнай здрады або іншага цяжкага злачынства».
- Таксама прапануецца надзяліць КС паўнамоцтвамі праверкі канстытуцыйнасьці пытаньняў, якія выносяцца на рэспубліканскі рэфэрэндум.
- Па словах Карповіч, усе краіны постсавецкай прасторы і большасьць эўрапейскіх дзяржаў маюць інстытут канстытуцыйнай скаргі грамадзян, які рэалізуецца ў розных формах.
- Кіраўніца Інстытуту прававых дасьледаваньняў Алена Сямашка, якая таксама ўваходзіць у Канстытуцыйную камісію, паведаміла БелТА, што разглядаецца магчымасьць увядзеньня ў дзяржаве суду прысяжных. Для гэтага патрабуецца зьмяніць артыкул 113 Канстытуцыі.
