Як пацьвердзілі парталу Tut.by тры не зьвязаныя паміж сабой крыніцы, заведзеная крымінальная справа паводле арт. 209 КК (махлярства). Заснавальнікаў і топ-мэнэджэраў падазраюць у завалоданьні маёмасьцю шляхам падману альбо злоўжываньня даверам.
«Камень сутыкненьня — даўгі Беразоўскага перад банкамі, прыватнымі і дзяржаўнымі пастаўшчыкамі, партнэрамі, работнікамі. Яго просяць усё пагасіць і тады выпусьцяць сваякоў. Ён кажа, што адразу пагасіць ня можа», — адзначаюць крыніцы.
Паводле інфармацыі парталу, жонку і сына Беразоўскага затрымалі на мінулым тыдні, калі сілавікі наведваліся ў галаўны офіс «НП-Сэрвіс», буйнога дыстрыбутара тавараў. Кампанія лічыцца падкантрольнай заснавальніку крамаў «Домашний».
У 2018 годзе кантралёры падазравалі «НП-Сэрвіс» ва ўхіленьні ад аплаты падаткаў. Беразоўскі тады быў у Лёндане, але вярнуўся і вырашыў пытаньні.
Іван і Сьвятлана Беразоўскія пачыналі бізнэс ў 1990-х індывідуальнымі прадпрымальнікамі на рынку ў Ждановічах. З часам сталі буйнымі імпартэрамі прадуктаў харчаваньня, уладальнікамі камэрцыйнай нерухомасьці.
У 2016-м адкрылі першы супэрмаркет «Домашний» у Менску. На піку сетка мела амаль да 80 крамаў па ўсёй Беларусі. Аднак сёлета ў лютым многія крэдыторы заявілі пра нявыкананыя абавязаньні на сотні тысяч рублёў. Ключавыя юрыдычныя асобы апэратара «Гама рытэйл», «Прэм’ер Маркет», «Семела» і іншыя з 12 красавіка знаходзяцца ў стане ліквідацыі.
Неўзабаве сытуацыяй зацікавіўся Дэпартамэнт фінансавых расьсьледаваньняў Камітэту дзяржкантролю.
