Па дадзеных за 2020 год, у першы раз па міжнародную абарону ў краінах Эўразьвязу зьвярнуліся 1165 грамадзян Беларусі, вынікае з апублікаванай статыстыкі Eurostat.
Сярод тых, хто зьвяртаўся па міжнародную абарону ў мінулым годзе, большасьць складаюць мужчыны — 745 чалавек. Практычна палова ўцекачоў — маладыя людзі ва ўзросьце ад 18 да 34 гадоў (510 чалавек).
У 2019 годзе, паводле дадзеных Eurostat, па атрыманьне статусу ўцекача ў Эўразьвязе зьвярнуліся 935 грамадзян Беларусі. Пры гэтым толькі крыху больш за траціну зь іх склалі маладыя людзі ад 18 да 34 гадоў.
У параўнаньні з 2019 годам значна вырасла колькасьць уцекачоў у Польшчу — з 30 першасных заяваў да 385, у Чэхію — з 10 да 60, і ў Літву — з 15 да 80. А колькасьць беларусаў, якія зьвярнуліся па атрыманьне статусу ўцекача ў Нідэрляндах, упала больш як удвая. Таксама зьнізілася колькасьць зваротаў па атрыманьне статусу ўцекача ў Нямеччыне і Францыі.
