Справа разглядаецца ў судзе Ленінскага раёну Магілёва. Судзьдзя — Тацяна Рахманенка, паведамляе сайт mogilev.online.
Згодна з матэрыяламі справы, у верасьні 2020 году Іван Ківа разьмясьціў пад адным з тэкстаў у групе «Народны патруль» абразьлівы камэнтар «зь ненарматыўнай лексыкай». Як мяркуе абвінавачаньне, ён тычыўся супрацоўнікаў міліцыі, пра якіх нібыта вялася гаворка ў публікацыі.
Іван Ківа не адмаўляе, што зрабіў камэнтар, аднак ня згодны, што словы былі накіраваныя ў адрас міліцыянтаў, якія на фота былі ў цывільным адзеньні. Ён таксама сьцьвярджае, што толькі выказаў сваю думку, ня больш.
Аднак абражаныя міліцыянты лічаць, што словы мужчыны нанесьлі ім «вялікую маральную шкоду». Двое зь іх патрабуюць па 5 тысяч рублёў кампэнсацыі, яшчэ адзін — 3 тысячы.
Наступнае пасяджэньне суду заплянавалі на 17 сакавіка.
