Пра недавер Пуціну заявілі 35% рэспандэнтаў — гэта паўтор максымальнага гадавога значэньня, зафіксаванага ў сакавіку 2020 году. Яшчэ 12% не змаглі адказаць на пытаньне: «Вы хутчэй давяраеце ці хутчэй не давяраеце Ўладзіміру Пуціну?»
Апытаньне праводзілася 22–24 студзеня сярод 3 тысячаў чалавек. Згодна з папярэднім апытаньнем ФОМ, узровень даверу Пуціну за ўвесь мінулы год не апускаўся ніжэй за 55%.
Апытаньне таксама паказала, што станоўча ацэньваюць працу Пуціна на пасадзе прэзыдэнта 60% расейцаў, адмоўна — 26%.
Паводле апытаньня «Лявада-цэнтру», у студзені мінулага году пра давер прэзыдэнту Пуціну заявілі крыху больш за траціну расейцаў (35%).
А па выніках дасьледаваньня ВЦИОМ (Усерасейскі цэнтар вывучэньня грамадзкай думкі), узровень даверу расейцаў да Ўладзіміра Пуціна ў сакавіку мінулага году зьнізіўся да мінімуму за 14 гадоў. Тады пра давер прэзыдэнту заявілі 28% удзельнікаў апытаньня. Такога нізкага паказьніку не было за ўсю гісторыю назіраньняў.
Пасьля гэтага ВЦИОМ зьмяніў мэтодыку і стаў задаваць закрытае пытаньне — пра тое, ці давярае рэспандэнт канкрэтна Ўладзіміру Пуціну. Аднак і такая фармулёўка паказала зьніжэньне даверу да прэзыдэнта — з 74% у студзені 2020 году да 67% у сакавіку.
