«Мы зразумелі, што трэба прымаць закон аб замежных агентах, што трэба паставіць заслон супраць фінансаваньня любых палітычных ініцыятываў у краіне, таму што гэта заўсёды адстойваньне чужых інтарэсаў, як робяць усе нармальныя краіны», — цытуе БЕЛТА словы Алега Гайдукевіча.
«Калі казаць пра палітычныя вынікі году, то галоўны вынік — гэта тое, што спроба дзяржаўнага перавароту ў краіне правалілася. Многія нашы палітыкі дагэтуль жывуць жніўнем, а ўжо канец сьнежня — мы хутка будзем сустракаць Новы год. Прыйшоў час зьбіраць камяні, таму што ня будзе гвалтоўнага зьвяржэньня ўлады, рашэньня лёсу Беларусі на вуліцы. Улада нікуды ня сыдзе і не ўцячэ — гэта ўсё казкі, што відавочна і зразумела», — заявіў лідэр ЛДПБ у «Клюбе рэдактараў».
Раней пра неабходнасьць прыняць у Беларусі закон аб замежных агентах заявіў старшыня сталай камісіі па міжнародных справах Андрэй Савіных.
У Расеі Дзяржаўная Дума і Савет Фэдэрацыі ўхвалілі законапраект, які дазваляе абвяшчаць замежнымі агентамі ня толькі арганізацыі, але і фізычных асобаў.
