Ала Шчацінка расказала Tut.by, што іх з мужам затрымалі 12 лістапада: яе — на працы, яго — дома. З РАУС жанчыну выпусьцілі, а яго адправілі ў ІЧУ.
На наступны дзень быў суд, які прызнаў мужа і жонку вінаватымі ва ўдзеле ў несанкцыянаваным мерапрыемстве. Алу аштрафавалі на 270 рублёў, Сяргею прызначылі пакараньне ў выглядзе 10 сутак пад арыштам у Асіповіцкім ІЧУ.
На волю ён выйшаў 22 лістапада. Ужо тады казаў, што адчувае сябе так, быццам падхапіў прастуду — сядзеў у адной камэры з мужчынам, у якога была высокая тэмпэратура.
Праз тры дні Сяргей адчуў пагаршэньне здароўя — працаваў сьлесарам на Асіповіцкім заводзе жалезабэтонных канструкцый. Яму адкрылі бальнічны, узялі мазок з насаглоткі для аналізу ПЦР. Ала прайшла гэтую ж працэдуру. У абаіх быў станоўчы тэст на каранавірус.
Наступныя два тыдні сям’я правяла дома. Муж скардзіўся на боль у грудзях, у яго была высокая тэмпература. Аднак брыгада лекараў у шпіталізацыі адмовіла.
11 сьнежня Сяргей Шчацінка памёр. Пайшоў з сынам мяняць колы ў машыне, упаў і больш не падняўся. У пасведчаньні аб сьмерці адзначана, што прычына невядомая. Матэрыялы адправілі на экспэртызу ў Магілёў, вынік будзе праз два месяцы.
«Каранавірус даў мне ўскладненьні на кішачнік, печань. Сяргею, мабыць, на лёгкія. Падчас бальнічнага яму рабілі КТ, якая паказала пашкоджаньне 25% лёгкіх, але ўзровень кіслароду быў у норме», — сказала ўдава.
Ужо пасьля сьмерці Сяргея Шчацінкі яму на працу прыйшло паведамленьне аб аплаце часу знаходжаньня ў ізалятары.
