24 лістапада зьявіўся ліст атлетаў, якія падтрымліваюць рэжым Лукашэнкі. Фанаты некалькіх клюбаў выступілі рэзка супраць гэтага звароту.
Калі пад лістом беларускіх спартоўцаў за новыя сумленныя выбары і супраць гвалту сілавікоў сабралася ўжо больш за 1100 подпісаў, праўладныя сілы запусьцілі альтэрнатыўную ініцыятыву. 24 лістапада зьявіўся ліст атлетаў, якія падтрымліваюць рэжым Лукашэнкі. Паводле «Трыбуны», аўтар дакумэнту — галоўны рэдактар «Спортивной панорамы» Ўладзімер Пехцераў. Ліст ён напісаў больш за месяц таму. З таго часу ён праходзіў узгадненьне ў Міністэрстве спорту і НАКу. І толькі днямі прынялі рашэньне яго апублікаваць.
«Трыбуна» піша, што подпісы зьбіраюць сярод хакеістаў, футбалістаў, арбітраў і ва Ўнівэрсытэце фізкультуры.
Фанаты некалькіх клюбаў выступілі рэзка супраць гэтага ліста. Іх рэакцыі сабрала «Трыбуна».
«Дынама» (Менск). «Верым у сумленьне дынамацаў і папярэджваем: кожны, хто падпіша гэта лайно, назаўжды застанецца здраднікам свайго народу і зганьбаванай пачварай у вачах усіх фанатаў „Дынама“ Менск».
«Дынама» (Берасьце): «Далучаемся да пазыцыі нашых менскіх сяброў з нагоды праўладнага ліста і дададзім, што ад такога подпісу ў вачах футбольных фанатаў Беларусі вам ня ўдасца адмыцца ніколі».
«Нёман» (Горадня): «Мы, фанаты „Нёмана“, лічым, што ўжо немагчыма сумленным людзям падпісвацца пад гэтым… Падпісаўшы ліст, ты тым самым падтрымліваеш гвалт і беззаконьне. І калі хтосьці зь „Нёмана“ зробіць такі крок, для нас ён пустое месца! Верым у ваша сумленьне! Разам мы „Нёман“!».
«Іслач» (Менскі : «Падзяляем пазыцыю нашых сяброў, што раней зьвярнуліся да сваіх клюбаў, і ад сябе хочам дадаць: асабістая справа кожнага, якую пазыцыю займаць, але, падпісаўшы гэты „ліст“, вы пагаджаецеся з усёй сваволяй, якая чыніцца ў нашай краіне. Добраахвотна прынятая ганьба ніколі ня будзе змытая ні з кога, хто паставіў подпіс».
«Гомель». «Тыя, хто падпіша гэты ліст, стануць здраднікамі і памагатымі рэжыму ў вачах нашага руху, гомельскай футбольнай грамадзкасьці і ўсёй краіны. Ніякія лісты і подпісы іх ня выратуюць. Беражыце свой гонар і не бярыце ўдзел у гульнях танных людзей з улады».
Фанаты хакейнага «Дынама» (Менск). «Подпіс за акупацыйны рэжым — таўро на вашай рэпутацыі. Ня важна, ці зробіце вы гэта пад бізуном, ці з уласнай ахвоты. Важна, што такім чынам вы падзяляеце тое беззаконьне, што чыніцца ў нашай краіне, што вас задавальняе дабітая рэпутацыя клюбу, і згодныя, што ўвесь спорт краіны мусіць хадзіць пад прыгнётам рэжыму».
