Прэсавую сакратарку «Задзіночаньня беларускіх студэнтаў» пакідаюць на два месяцы пад вартай. Яна знаходзіцца ў СІЗА КДБ, паведамляе тэлеграм-канал «Студэнцкая думка».
Ксенію і іншых затрыманых сябраў ЗБС абвінавачваюць у арганізацыі і падрыхтоўцы дзеяньняў, якія груба парушаюць грамадзкі парадак (ч.1 арт. 342 Крымінальнага кодэксу).
Сёньня паводле гэтага ж артыкула завялі крымінальную справу супраць студэнта Лінгвістычнага ўнівэрсытэту Глеба Фіцнера, які знаходзіцца ў СІЗА КДБ. Ён таксама арыштаваны на два месяцы.
12 лістапада прайшлі ператрусы ў сямі актывістаў ЗБС. Сярод іх былі Яна Арабейка, Кася Будзько, Алана Гебрэмарыям, Ягор Канеўскі, Ксенія Сырамалот, Глеб Фіцнер.
Затрыманая 12 лістапада ў Менску актывістка «Задзіночаньня беларускіх студэнтаў» і ініцыятывы «Моладзевы блёк», сябра Каардынацыйнай рады па ўрэгуляваньні палітычнага крызісу ў Беларусі (КР), прадстаўніца Сьвятланы Ціханоўскай у справах моладзі і студэнтаў Алана Гебрэмарыям была прызнаная падазраванай у крымінальнай справе 14 лістапада.
Затрыманым студэнтам пагражае да трох гадоў пазбаўленьня волі.
