Шэраг праваабарончых арганізацый Беларусі просіць бізнэс даносіць патэнцыйных партнэрам інфармацыю пра сытуацыю ў краіне і ў выпадку падтрымкі гвалту з боку кампаньёнаў спыняць працоўныя кантакты. Тэкст заявы апублікаваў Праваабарончы цэнтар «Вясна».
Асноўныя тэзісы:
- «Выбарчая кампанія суправаджалася масавымі парушэньнямі міжнародна-прававых абавязаньняў Беларусі ў сфэры правоў чалавека, Канстытуцыі, Выбарчага кодэксу, а таксама шматлікімі парушэньнямі агульнапрызнаных стандартаў дэмакратычных выбараў АБСЭ.
- Абвешчаныя ўладамі вынікі выбараў не прызнаў шэраг дзяржаў, у тым ліку ЗША, Канада, Вялікая Брытанія і краіны Эўрапейскага Зьвязу. Дзясяткі тысяч беларусаў выйшлі на мірныя пратэсты — улады адрэагавалі неадэкватным ужываньнем сілы і спэцыяльных сродкаў, уключаючы сьвятлашумавыя гранаты, гумавыя кулі, вадамёты.
- Мірныя пратэсты працягваюцца ўжо 3 месяцы. Яны суправаджаюцца масавымі адвольнымі затрыманьнямі людзей (на сёньняшні дзень затрымана больш за 17 000 чалавек), катаваньнямі і бесчалавечным абыходжаньнем з боку органаў аховы правапарадку.
- Не працуюць прававыя мэханізмы абароны парушаных правоў, адсутнічае справядлівы суд».
Таксама праваабаронцы адзначаюць, што кожная кампанія, якая працуе сёньня ў Беларусі або мае бізнэс-сувязі зь беларускімі партнэрамі, як дзяржаўнымі, так і прыватнымі, мае рызыкі стаць датычнай да парушэньняў агульнапрызнаных правоў чалавека, а затым панесьці рэпутацыйныя і фінансавыя страты.
Праваабаронцы просяць бізнэс:
- Публічна выступіць супраць гвалту і парушэньняў правоў чалавека падчас выбарчай кампаніі і мірных пратэстаў — 2020 у Беларусі.
- Давесьці да ведама сваіх беларускіх партнэраў непрымальнасьць дзеяньняў, якія парушаюць правы чалавека, у тым ліку і любога перасьледу за выказваньне сваёй грамадзянскай пазыцыі, бо гэта можа пацягнуць спыненьне кантрактаў.
Для подпісу пад гэтым зваротам просяць зьвяртацца на адрас office@belhelcom.org.
Па стане на 6 лістапада заяву падпісалі:
- Беларускі Хэльсынскі камітэт;
- Праваабарончы цэнтар «Вясна»;
- Беларускі дакумэнтацыйны цэнтар;
- Беларускі дом правоў чалавека імя Барыса Звоскава;
- «Прававая ініцыятыва»;
- Кансультацыйны цэнтар актуальных міжнародных практык і іх імплемэнтацыі ў праве Human Constanta;
- Асамблея няўрадавых дэмакратычных арганізацый Беларусі;
- Простае таварыства «Ініцыятыва FORB»;
- Офіс правоў людзей з інваліднасьцю;
- Беларускі ПЭН-цэнтар;
- Цэнтар прававой трансфармацыі Lawtrend;
- Беларуская асацыяцыя журналістаў;
Зварот падтрымалі Беларускі кангрэс дэмакратычных прафсаюзаў, у які ўваходзяць Беларускі незалежны прафсаюз (БНП), Свабодны прафсаюз Беларускі (СПБ), Свабодны прафсаюз мэталістаў (СПМ) і Беларускі прафсаюз работнікаў радыёэлектроннай прамысловасьці (РЭП).
