Стаматолягі заклікаюць сусьветную мэдычную супольнасьць абмежаваць кантакты з рэктарам Беларускага дзяржаўнага мэдычнага ўнівэрсытэту Сяргеем Рубніковічам, а таксама байкатаваць прыватныя цэнтры, якія належаць Рубніковічу і ягонай сям’і. Пра гэта яны пішуць у адкрытым лісьце.
Беларускія стаматолягі зь дзяржаўных і прыватных арганізацый падпісалі адкрыты зварот супраць таго, што адбываецца ў Беларускім дзяржаўным мэдычным унівэрсытэце. Мэдыкі абураныя адлічэньнем 19 студэнтаў з ВНУ, у якой калісьці вучыліся самі. Яны назвалі рэктара Рубніковіча «былым калегам» і заклікалі не прыходзіць у прыватныя мэдыцынскія цэнтры «Профи-дент» і «Доктор Профи», якімі валодае Рубніковіч і ягоная сям’я.
Пад адкрытым лістом падпісаліся ўжо больш за 300 стаматолягаў.
Акрамя таго, стаматолягі заклікаюць калегаў выйсьці зь Беларускага рэспубліканскага грамадзкага аб’яднаньня спэцыялістаў стаматалёгіі і ня ўдзельнічаць у яго мерапрыемствах, адмовіцца ад падпіскі на часопіс «Стоматолог».
«...асноўным крытэрам выбару на месца рэктара вядучай мэдыцынскай ВНУ краіны была асабістая адданасьць дыктатару і той палітыцы, якую ён праводзіць. <...> Мы заклікаем лекараў-стаматолягаў гэтых цэнтраў падумаць аб тым, ці варта працаваць на таго, хто гатовы выконваць злачынныя загады нелегітымнай улады», — пішуць аўтары ліста.
