Нацыянальны акадэмічны драматычны тэатар імя Горкага з 6 па 17 кастрычніка адмяняе спэктаклі. Як паведамляецца на сайце, «у сувязі са складанай санітарна-эпідэміялягічнай сытуацыяй у тэатры».
Як сказаў Свабодзе дырэктар тэатру Эдуард Герасімовіч, некаторыя акторы — кантакты першага ўзроўню.
«Існуе такі парадак: кантакты першага ўзроўню, у якіх захварэлі сябры ці сваякі на COVID-19, павінны заставацца дома. Самаізаляцыя некаторых актораў не дазваляе ў поўнай ступені адыграць спэктаклі. Такіх, хто захварэў на каранавірус, пакуль у тэатры няма, але ёсьць кантакты першага ўзроўню», — кажа дырэктар НАДТ імя Горкага.
Усяго адменена 10 спэктакляў, якія павінны былі ісьці на Малой сцэне НАДТ імя Горкага і ў Палацы прафсаюзаў. Адмененыя спэктаклі «Сыходзіў сужонак ад сужонкі», «Лэдзі на дзень», «Як стаць багатым», «Оскар і Ружовая Дама», «Эдып», «Гора ад розуму», «Дванаццатая ноч».
Квіткі можна здаць у касах тэатру.
