Справу гарадзенца Ўладзімера Родчанкі пачалі разглядаць у судзе Ленінскага раёну Горадні 22 верасьня. Суд адправіў справу на дапрацоўку.
Родчанка праходзіць у адміністрацыйнай справе за ўдзел у несанкцыянаваным масавым мерапрыемстве (частка 3 артыкулу 23.34 КаАП). Ён разам з паплечнікамі выйшаў 12 жніўня з плякатам 5-гадовай дзяўчынкі, якая пацярпела падчас аварыі з вайсковай тэхнікай. Яны сталі на калені на плошчы Леніна. Неўзабаве іх затрымалі міліцыянты і пабілі ў мікрааўтобусе, а пазьней у РАУС.
Справу разглядаў судзьдзя Генадзь Мазайла. Адвакат Родчанкі Аляксандар Бірылаў заявіў хадайніцтва, каб адправіць справу на дапрацоўку. Прычына — у адміністрацыйным пратаколе шмат выпраўленьняў, якія не заверыла асоба, якая складала пратакол. Судзьдзя ўхваліў хадайніцтва.
Гэтая публікацыя падрыхтаваная з выкарыстаньнем інфармацыі БелаПАН.
